வங்கிக் கடன்பெற தொழில் முனைவோா் விண்ணப்பிக்கலாம்

தேனி மாவட்டத்தில் குறுதொழில் முனைவோா், குறு உற்பத்தி நிறுவனங்கள் குறைந்த வட்டியில் வங்கிக் கடன் பெற விண்ணப்பிக்கலாம் என்று அறிவிக்கப்பட்டது.

இதுகுறித்து மாவட்ட நிா்வாகம் வெளியிட்ட செய்திக் குறிப்பு: தமிழ்நாடு தொழில் கூட்டுறவு வங்கி (தாய்கோ வங்கி) சாா்பில் கலைஞரின் கடனுதவி திட்டத்தின் கீழ் குறுதொழில் முனைவோா், குறு உற்பத்தி நிறுவனங்களுக்கு அசையா சொத்து அடமானத்தின் பேரில், 7 சதவீதம் வட்டியில் ரூ.20 லட்சம் வரை நடைமுறை மூலதனம், மூலதனக் கடன் வழங்கப்படுகிறது.

இந்தத் திட்டத்தின் கீழ் புதிய, ஏற்கெனவே செயல்பட்டு வரும் குறு தொழில் நிறுவனங்கள் வங்கிக் கடன் பெறலாம்.

வங்கிக் கடன் பெற விரும்புவோா்கள் தேனி மாவட்ட தொழில் மையம், கம்பம் சாலையில் உள்ள தாய்கோ வங்கியில் நேரிலும், தொலைபேசி எண்: 04546-252163, கைபேசி எண்கள்: 96007 10735, 86955 65626 ஆகியவற்றில் தொடா்பு கொண்டு தெரிந்து கொள்ளலாம் என இதில் தெரிவிக்கப்பட்டது.