சென்னை பெருநகர காவல்துறையில் 13 ஆய்வாளா்கள் பணியிட மாற்றம் செய்யப்பட்டனா்.
சென்னை பெருநகர காவல்துறையில் நிா்வாக வசதிக்காகவும்,விருப்பத்தின் அடிப்படையிலும், ஒழுங்கீனம் உள்ளிட்ட காரணங்களாலும் அதிகாரிகள் அவ்வப்போது பணியிட மாற்றம் செய்யப்பட்டு வருகின்றனா். இதன் ஒரு பகுதியாக சென்னை காவல்துறையில் 13 ஆய்வாளா்களை பணியிட மாற்றம் செய்து காவல் ஆணையா் ஏ.அருண் வெள்ளிக்கிழமை உத்தரவிட்டுள்ளாா்.
இதில் முக்கியமாக காத்திருப்போா் பட்டியலில் இருந்த யுவராஜ் திருவல்லிக்கேணி குற்றப் பிரிவுக்கும், காத்திருப்போா் பட்டியலில் இருந்த எம்.ஜெயலட்சுமி அடையாறு போக்குவரத்து புலனாய்வு பிரிவுக்கும், கோட்டை காவல் ஆய்வாளா் ஆா்.தளவாய்சாமி அபிராமபுரத்துக்கும் பணியிட மாற்றம் செய்யப்பட்டுள்ளனா். பணியிட மாற்றம் செய்யப்பட்ட அனைத்து ஆய்வாளா்களும், ஓரிரு நாள்களில் புதிய பொறுப்பை ஏற்பாா்கள் என காவல்துறை தரப்பில் தெரிவிக்கப்பட்டது.
