Russia Pro32: அதீத திறமை.. 7 வயது சிறுவனுக்கு `பயிற்சித் தலைவர்' பதவி வழங்கிய ரஷ்ய ஐடி நிறுவனம்!
Admin
- 2 hours ago
ரஷ்யாவின் மாஸ்கோவை தலைமையிடமாக கொண்டு உலகின் பல்வேறு நாடுகளில் இயங்கிவரும் "PRO32 " என்ற மென்பொருள் நிறுவனம், தங்கள் நிறுவனத்தில் ஏழு வயது சிறுவனை பணியமர்த்தி உலகின் பார்வையை தன் பக்கம் ஈர்த்துள்ளது.
ரஷ்யாவின் செயின்ட் பீட்டர்ஸ்பர்க்கை சேர்ந்த ஏழு வயதே ஆன சிறுவன் சேர்கே. சிறுவயதிலேயே கணினியில் ஆர்வம் கொண்ட இவர் 'பைதான் மற்றும் யூனிட்டி' போன்ற ப்ரோக்ராம் மொழிகளில் அதீத ஆர்வம் கொண்டு கற்றுக்கொள்வதில் ஆர்வம் காட்டியுள்ளார்.
தானறிந்த கணினி அறிவை பயன்படுத்தி தமது ஐந்தாம் வயதில் YouTube சேனல் ஒன்றை ஆரம்பித்துள்ளார். ஆர்வமுள்ள குறியீட்டாளர்களுக்கான தளமாக செயல்படும் இந்த சேனலில், பயிற்சிகள், குறியீட்டு சவால்கள் மற்றும் இயந்திர கற்றல் போன்ற மேம்பட்ட தலைப்புகளின் விளக்கங்களைக் தொடர்ந்து வழங்கி வருகிறார். குறியீட்டு கருத்துக்களைப் கற்பிக்கும் அவரது திறன் இளம் பார்வையாளர்களை மட்டுமல்ல, பெரியவர்களையும் கவர்ந்துள்ளதால் குறுகிய காலத்திலேயே ஆயிரக்கணக்கான பின்தொடர்பாளர்களை பெற்றுள்ளார். பல செயற்கை நுண்ணறிவுக் கருவிகளை (Artificial intelligence tools) அடிப்படையாகக் கொண்ட நெட்வொர்க்குகளைப் பற்றி அதிகம் தெரிந்து கொள்ள விரும்புவர்களுக்கு இவரது சேனல் மிகவும் பயனுள்ளதாக உள்ளது என்று பயனாளர்கள் கூறுகிறார்கள் .
இவரது தனிப்பட்ட திறமை மற்றும் ஆர்வத்தை அறிந்த, தகவல் பாதுகாப்பு நிறுவனமான ‘Pro32’, அச்சிறுவனுக்கு "கார்ப்பரேட் பயிற்சித் தலைவர்" பதவிக்கான வேலைவாய்ப்பை வழங்கி, எழுத்துப்பூர்வ கடிதத்தை அனுப்பியது.
ஐடி கோடிங்கில் அதீத திறமை கொண்டுள்ள ஏழு வயதான சேர்கேவை வேலைக்குச் செல்ல தகுதியான வயது வந்தவுடன் தங்களது மேலாண்மை குழுவில் சேர ‘Pro32’ மென்பொருள் நிறுவனம் அழைப்பு விடுத்துள்ளது. ரஷ்ய சட்டத்தின் கீழ், சேர்கே தனது 14 வயது வரை ஊதியம் பெறும் எந்த வேலையையும் ஏற்க முடியாது என்பதால் Pro32 நிறுவனம் சேர்கேக்கு 14 வயதாகும் வரை காத்திருக்க வேண்டும் என்பது குறிப்பிடத்தக்கது .
சேர்கேக்கு 14 வயதாகும் வரை, தங்கள் நிறுவனமும் சேர்கேவும் இணைந்து செயல்படுவதற்கான வழிகள் குறித்து அவரது பெற்றோரிடம் பேசி வருவதாகவும், சேர்கே பணியில் சேர நாங்கள் ஏழு ஆண்டுகள் காத்திருக்க வேண்டும். அப்போது அவருடைய சம்பளத்தைப் பற்றி நிச்சயமாக நாங்கள் பேசுவோம், என Pro32 இன் தலைமை நிர்வாகி இகோர் மண்டிக் ஊடகங்களிடம் தெரிவித்துள்ளார் .
நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...
