Washington Sundar : 3 வருடங்களுக்குப் பிறகு கம்பேக்; `இது கடவுளின் திட்டம்' - நெகிழும் வாஷி

இந்தியா மற்றும் நியூசிலாந்து அணிகளுக்கிடையேயான இரண்டாவது டெஸ்ட் போட்டி புனேவில் நடந்து வருகிறது. பெங்களூருவில் நடந்த முதல் டெஸ்ட்டில் இந்தியா தோற்றிருந்தது. இந்நிலையில் இந்த டெஸ்ட் போட்டியில் நியூசிலாந்து அணி முதலில் பேட்டிங் செய்தது. இந்தியா சார்பில் தமிழக வீரர் வாஷிங்டன் சுந்தர் மிகச்சிறப்பாக வீசி 7 விக்கெட்டுகளை வீழ்த்தியிருந்தார்.

நியூசிலாந்துக்கு எதிராக வாஷி வீசியது அற்புதமான ஸ்பெல். முதல் டெஸ்ட்டை இந்தியாவின் கையிலிருந்து பறித்த ரச்சின் ரவீந்திராவின் விக்கெட்டை. வீழ்த்தி தன்னுடைய வேட்டையைத் தொடங்கிய வாஷி எஞ்சியிருந்த அத்தனை விக்கெட்டுகளையும் வீழ்த்தியிருந்தார். 197-3 என்ற நிலையிலிருந்த நியூசிலாந்து அணி அடுத்த 62 ரன்களை சேர்ப்பதற்குள் 7 விக்கெட்டுகளை இழந்து நிலைகுலைந்தது. இத்தனைக்கும் வாஷிங்டன் சுந்தர் கடைசியாக டெஸ்ட் போட்டிகளில் ஆடி மூன்றரை ஆண்டுகளுக்கு மேல் ஆகிவிட்டது. திடீரென கிடைத்த இந்த வாய்ப்பைப் பயன்படுத்திக் கொண்டு கலக்கிவிட்டார்.

இந்த அற்புதமான செயல்பாடை பற்றி வாஷிங்டன் சுந்தர் பேசுகையில், 'நேர்மையாக சொல்ல வேண்டுமெனில் இதெல்லாமே கடவுளின் திட்டம் என்றுதான் நினைக்கிறேன். நான் வீசும் ஒவ்வொரு பந்திலும் என்னுடைய முழுத்திறனையும் வெளிக்காட்ட விரும்புகிறேன். ஒரு நாளின் தொடக்கத்திலிருந்தே நான் வீசும் முதல் பந்திலிருந்தே என்னுடைய 100 சதவிகிதத்தையும் கொடுக்க வேண்டும். நேற்றும் அப்படித்தான் என்னுடைய முதல் பந்திலிருந்தே நன்றாக வீசியதாகத்தான் எண்ணுகிறேன். லைன் & லெந்தை பேட்டருக்கு இடம் கொடுக்காமல் டைட்டாக வைத்துக் கொள்ள வேண்டும் என விரும்பினேன்.

முதல் செஷனில் பிட்ச்சில் ஸ்பின்னர்களுக்கு நிறையவே உதவி கிடைத்தது. நான் பெரிதாக எதையும் வித்தியாசமாக முயற்சி செய்ய நினைக்கவில்லை. வேகத்தை மட்டுமே கொஞ்சம் மாற்றி மாற்றி வீசினேன். மற்றபடி ஒரு சீரான லைன் & லெந்த்தை மெயின்டெயின் செய்யவே நினைத்தேன். நேற்றைய நாள் முழுவதுமே எனக்கு சிறப்பான தருணங்களாலேயே நிரம்பியிருந்தது.

ஒரு பௌலராக எப்போதுமே அப்டேட்டடாக இருக்கவே விரும்புகிறேன். அது ரொம்பவே முக்கியமான விஷயம் என்று கூட நினைக்கிறேன். அதன் வழியாக இப்படியான சம்பவங்கள் நிகழும்போது மகிழ்ச்சியாகத்தான் இருக்கிறது.' என்றார்.