அதிக குப்பை உற்பத்தி செய்வோருக்கு மாநகராட்சி எச்சரிக்கை!

நன்றி: தினமணிஇணையதளம்.

சென்னை மாநகராட்சி பகுதியில் பெருமளவு திடக்கழிவு கொட்டுவோா் விதிமீறலில் ஈடுபட்டால் ரூ.5,000 அபராதம் விதிக்கப்படும் என மாநகராட்சி ஆணையா் ஜெ.குமரகுருபரன் தெரிவித்துள்ளாா்.

இது குறித்து அவா் வெளியிட்ட செய்திக் குறிப்பு:

சென்னை மாநகராட்சி, திடக்கழிவு மேலாண்மை விதிகள் 2019-இன்படி, 100 கிலோவுக்கு மேல் கழிவு உற்பத்தி செய்யும் மத்திய, மாநில அரசு துறைகளின் கட்டடங்கள், உள்ளாட்சி அமைப்புகள், பொதுத்துறை நிறுவனங்கள், தனியாா் நிறுவனங்கள், மருத்துவமனைகள், கல்வி நிறுவனங்கள், தங்கும் விடுதிகள், ஹோட்டல்கள், வணிக நிறுவனங்கள், சந்தைகள், வழிபாட்டுத் தலங்கள், மைதானங்கள் மற்றும் விளையாட்டு வளாகங்கள் உள்ளிட்டவை ‘பெருமளவு திடக்கழிவு உற்பத்தியாளா்களாக’ வகைப்படுத்தப்பட்டுள்ளது.

மேலும், 5,000 ச.மீ. மேல் பரப்பளவு கொண்ட அல்லது 100 கிலோவுக்கு மேல் கழிவு உற்பத்தி செய்யும் குடியிருப்போா் நலச் சங்கங்கள் மற்றும் நிறுவனங்கள் தங்கள் வளாகத்தில் உற்பத்தியாகும் திடக்கழிவுகைளை தரம் பிரித்து ஒப்படைக்க வேண்டும். மக்கக்கூடிய கழிவுகளை முடிந்தளவு தங்கள் வளாகத்துக்குள் உரமாக்க அறிவுறுத்தப்பட்டுள்ளது. பதப்படுத்தி உரமாக்க முடியாத பட்சத்தில் கழிவுகளை குப்பை சேகரிப்பாளா்களிடம் ஒப்படைக்க வேண்டும். அதை தவிா்த்து பெருமளவு திடக்கழிவு உற்பத்தியாளா்கள் தெருக்களில் வைக்கப்பட்டுள்ள குப்பைத் தொட்டிகளில் குப்பைகளை கொட்டக் கூடாது.

சென்னை மாநகராட்சி சாா்பில் ஆய்வுக்காக வரும்போது, குப்பை சேகரிப்பாளா்கள் அல்லது மறுசுழற்சி செய்பவா்கள் மூலம் குப்பைகள் அகற்றுவதற்கான புரிந்துணா்வு ஒப்பந்தத்தைக் காண்பிக்க வேண்டும். உரிய விதிகளைப் பின்பற்றாமல் விதிமீறலில் ஈடுபடுவோருக்கு ரூ.5,000 அபராதம் விதிக்கப்படும் எனத் தெரிவித்துள்ளாா்.