கல்லூரிகளில் நிலவும் ஊதிய பிரச்னை விரைவில் தீா்க்கப்படும்: உயா் கல்வித் துறை அமைச்சா் கோவி. செழியன்

தமிழகத்தில் அரசுக் கல்லூரிகளில் நிலவும் ஊதியம் மற்றும் ஓய்வூதியம் தொடா்பான பிரச்னைகள் விரைவில் தீா்க்கப்படும் என்று உயா்கல்வித் துறை அமைச்சா் கோவி. செழியன் கூறினாா்.

கும்பகோணம் அரசு கலைக் கல்லூரியில் 2020-21-ஆம் ஆண்டில் படித்த இளநிலை மாணவா்களுக்கு வெள்ளிக்கிழமை பட்டமளிப்பு விழா நடைபெற்றது. சனிக்கிழமை நடைபெற்ற முதுகலை மாணவா்களுக்கான பட்டமளிப்பு விழாவில் பங்கேற்ற அமைச்சா் கோவி. செழியன், பின்னா் செய்தியாளா்களிடம் கூறியதாவது:

பாரதிதாசன் பல்கலைக்கழகத்துக்குள்பட்ட கல்லூரிகளில் பணியாற்றும் கெளரவ விரிவுரையாளா்களின் ஊதியம் குறித்த போராட்டம் தொடா்பாக பேச்சுவாா்த்தை நடைபெற்று வருகிறது. சனிக்கிழமைக்குள் பிரச்னை தீர வாய்ப்புள்ளது. இதேபோல், தமிழக கல்லூரிகளில் நிலவும் ஊதியம் மற்றும் ஓய்வூதிய பிரச்னைகள் விரைவில் தீா்க்கப்படும்.

அரசு கல்லூரிகளில் காலியாக உள்ள பணியிடங்களில் தற்காலிகமாக கெளரவ விரிவுரையாளா்கள் நியமிக்கப்பட்டுள்ளனா். விரைவில் நிரந்தர விரிவுரையாளா்கள் நியமிக்கப்படுவா். ஒன்றிய அரசின் தேசிய கல்வி கொள்கையைவிட, தமிழக அரசின் கல்விக் கொள்கை சிறந்தது; உயா்ந்தது என்றாா் அமைச்சா்.

முன்னதாக, பட்டமளிப்பு விழாவில் 1487 மாணவா்களுக்கு பட்டங்கள் வழங்கப்பட்டன.

ஏற்பாடுகளை கல்லூரி முதல்வா் அ. மாதவி, தோ்வு கட்டுப்பாட்டு அலுவலா் ரா.சா. சுந்தரராசன், துறைத் தலைவா்கள், ஆசிரியா்கள், அலுவலா்கள் செய்திருந்தனா்.

முதல்நாளான வெள்ளிக்கிழமை நடைபெற்ற பட்டமளிப்பு விழாவில் திருவாரூா் மத்திய பல்கலைக்கழக துணைவேந்தா் மு. கிருஷ்ணன் பங்கேற்று மாணவா்களுக்கு பட்டங்களை வழங்கினாா்.