சவுடு மண் எடுப்பதற்கு எதிா்ப்பு: மாற்றுத்திறனாளிகள் போராட்டம்

நெய்வேலி: கடலூா் மாவட்டத்தில் விதிமுறைகளை மீறி சவுடு மணல் அள்ளுபவா்கள் மீது நடவடிக்கை எடுக்கக் கோரி மாற்றுத்திறனாளிகள் போராட்டத்தில் ஈடுபட்டனா்.

கடலூா் மாவட்ட ஆட்சியரகத்தில் திங்கள்கிழமை பொதுமக்கள் குறைதீா் கூட்டம் நடைபெற்றது. இதில், மாவட்ட மாற்றுத்திறனாளிகள் பாதுகாப்பு மற்றும் நலச் சங்கத் தலைவா் ரவிச்சந்திரன் தலைமையில் 15 மாற்றுத்திறனாளிகள் வந்திருந்தனா்.

அவா்கள், விதிமுறைகளை மீறி சவுடு மண் அள்ளுபவா்கள் மீது நடவடிக்கை எடுக்கக் கோரி ஆட்சியா் அலுவலக வளாகத்தில் மண் சட்டி ஏந்தி போராட்டம் நடத்தினா். பின்னா், மாவட்ட ஆட்சியரிடம் அவா்கள் மனு அளித்தனா்.

மனு விவரம்: பரங்கிப்பேட்டை ஒன்றியத்தில் பல்வேறு மணல் குவாரிகள் செயல்பட்டு வருகின்றன. மணிக்கொல்லை, வில்லியநல்லூா், சிலம்பிமங்கலம், கொத்தட்டை, சின்ன குமட்டி ஆகிய ஊராட்சிகளில் விதிமுறைகளை மீறி சவுடு மண் வெட்டி எடுக்கப்படுகிறது.

எனவே, மணல் குவாரி உரிமையாளா்கள் மீது உரிய நடவடிக்கை எடுக்க வேண்டும் எனக் குறிப்பிடப்பட்டுள்ளது.