`ஜாமீன் கிடையாது' - பாலியல் வழக்கில் பிரஜ்வல் ரேவண்ணாவின் மனுவைத் தள்ளுபடி செய்த உயர் நீதிமன்றம்!

பாலியல் வழக்கில் சிக்கிய மதச்சார்பற்ற ஜனதா தளத்தின் முன்னாள் எம்.பி பிரஜ்வல் ரேவண்ணாவின் ஜாமீன் கோரிக்கையை கர்நாடக உயர் நீதிமன்றம் நிராகரித்திருக்கிறது. முன்னதாக, நடந்து முடிந்த மக்களவைத் தேர்தல் சமயத்தில் பிரஜ்வல் தொடர்பான 2,900-க்கும் மேற்பட்ட பாலியல் வீடியோக்கள் சமூக வலைதளங்களில் வெளியாகி பெரும் அதிர்வலையை ஏற்படுத்தின.

அதைத் தொடர்ந்து, இந்த விவகாரத்தை விசாரிக்க சிறப்பு விசாரணைக் குழுவை மாநில அரசு அமைக்க, பிரஜ்வல் மீது பாலியல் துன்புறுத்தல், பாலியல் வன்கொடுமைகள் புகார்கள் குவிந்தன. இதற்கிடையில், கர்நாடகாவில் வாக்குப்பதிவு முடிந்த வெளிநாட்டுக்குத் தப்பினார். பின்னர், மே 31-ம் தேதி நாடு திரும்பிய அன்றே போலீஸாரால் கைதுசெய்யப்பட்டார். அதைத் தொடர்ந்து, பிரஜ்வல் மீது மூன்று பாலியல் வழக்கில் குற்றப்பத்திரிகைகளை சிறப்பு விசாரணைக் குழு தாக்கல் செய்தது.

அதில், ஆகஸ்ட் 23-ம் தேதி தாக்கல் செய்யப்பட்ட குற்றப்பத்திரிகையில், பிரஜ்வல் வீட்டில் சமையல் வேலை பார்த்துவந்த பெண்ணையும், அவரின் மகளையும் பிரஜ்வல் பாலியல் வன்கொடுமை செய்ததாகக் குற்றம்சாட்டப்பட்டிருந்தது. அதையடுத்து, செப்டம்பர் 9-ம் தேதி தாக்கல் செய்யப்பட்ட இரண்டாவது குற்றப்பத்திரிகையில், தனது பண்ணை வீட்டில் பணிபுரிந்துவந்த பெண்ணை பிரஜ்வல் பாலியல் வன்கொடுமை செய்ததாகக் குறிப்பிடப்பட்டிருந்தது. செப்டம்பர் 13-ம் தேதி தாக்கல் செய்யப்பட்ட குற்றப்பத்திரிகையில், தனது தொகுதியின் பெண் பஞ்சாயத்து உறுப்பினரை மூன்று ஆண்டுகளாக பாலியல் வன்கொடுமை செய்ததாக பிரஜ்வல் மீது குற்றம் சுமத்தப்பட்டிருந்தது.

மேலும், நிலுவையிலிருக்கும் நான்காவது வழக்கில் பல பெண்கள் பிரஜ்வல் மீது பாலியல் புகாரளித்திருக்கின்றனர். இதனால், தன் மீது குற்றப்பத்திரிகை தாக்கல் செய்யப்பட்ட மூன்று வழக்குகளிலிருந்தும் ஜாமீன் வழங்கக் கோரி மாநில உயர் நீதிமன்றத்தில் பிரஜ்வல் தனித்தனி மனுக்களைத் தாக்கல் செய்திருந்தார். இந்த மனுக்கள் விசாரித்த நீதிபதி எம்.நாகபிரசன்னா தலைமையிலான அமர்வு, செப்டம்பர் 19-ம் தேதியன்று தீர்ப்பை ஒத்திவைத்திருந்தது. இந்த நிலையில், உயர் நீதிமன்றம் இன்று பிரஜ்வலின் ஜாமீன் கோரிக்கையை இன்று நிராகரித்து மனுக்களைத் தள்ளுபடி செய்திருக்கிறது.