நயன்தாரா ஆவணப்படம் தொடர்பாக, தனுஷ் தொடர்ந்த வழக்கை ரத்து செய்யக்கோரி நெட்ஃபிளிக்ஸ் நிறுவனம் தாக்கல் செய்த மனுவை சென்னை உயர் நீதிமன்றம் தள்ளுபடி செய்துள்ளது.
இயக்குநா் விக்னேஷ் சிவன் இயக்கத்தில் நயன்தாரா நடித்த ‘நானும் ரௌடி தான்’ திரைப்படத்தை தனுஷின் வொண்டா்பாா் நிறுவனம் தயாரித்தது. நடிகை நயன்தாரா திருமண ஆவணப்படம் கடந்த நவம்பா் மாதம் வெளியானது.
அதில், நானும் ரௌடி தான் படப்பிடிப்பில் நயன்தாரா, விக்னேஷ் சிவன் உரையாடும் காட்சிகள் பயன்படுத்தப்பட்டன. மேலும், அந்தப் படத்தின் சில படப்பிடிப்பு காட்சிகளை அனுமதியின்றி பயன்படுத்தியதாக கூறி, ரூ. 10 கோடி இழப்பீடு வழங்கவும் காட்சிகளை ஆவணப்படத்தில் பயன்படுத்தத் தடை விதிக்கக் கோரியும் வொண்டா் பாா் நிறுவனம் சென்னை உயா்நீதிமன்றத்தில் முன்னதாக வழக்கு தொடா்ந்தது.
இதையும் படிக்க: உ.பி. திருவிழாவில் மேடை சரிந்ததில் 7 பேர் பலி; 50-க்கும் மேற்பட்டோர் காயம்!
இதனைத் தொடர்ந்து, தனுஷ் தொடர்ந்த வழக்கை ரத்துச் செய்யக்கோரி மனு ஒன்றை நெட்ஃபிளிக்ஸ் நிறுவனம் சென்னை உயா்நீதிமன்றத்தில் தாக்கல் செய்தது.
சென்னை உயர் நீதிமன்றத்தில் இவ்வழக்கு இன்று(ஜன. 28) விசாரணைக்கு வந்த நிலையில், சென்னை உயர் நீதிமன்றத்தில் வழக்கு தொடர முடியாது என்று தெரிவித்து நெட்ஃபிளிக்ஸ் நிறுவனத்தின் மனுவை நீதிபதி தள்ளுபடி செய்து உத்தரவிட்டார்.
மேலும், வொண்டா்பாா் நிறுவனம் தாக்கல் செய்த உரிமையியல் வழக்கை பிப். 5 ஆம் தேதிக்கு ஒத்திவைத்தார்.
