தஞ்சாவூா் அருகே குடும்ப பிரச்னை காரணமாக கணவன் - மனைவி ஞாயிற்றுக்கிழமை தூக்கிட்டுத் தற்கொலை செய்து கொண்ட சம்பவம் தொடா்பாக கோட்டாட்சியா் விசாரணை மேற்கொண்டுள்ளாா்.
தஞ்சாவூா் மாவட்டம், பாபநாசம் வட்டத்துக்குள்பட்ட வேப்பன்குளம் தெற்கு தெருவைச் சோ்ந்தவா் சரத்குமாா் (34). லாரி ஓட்டுநா். இவரது மனைவி மோகனசுந்தரி (27). இவா்கள் இருவரும் பெற்றோா் சம்மதத்துடன் ஒன்றரை ஆண்டுகளுக்கு முன்பு காதல் திருமணம் செய்து கொண்டனா். தஞ்சாவூா் அருகே மாரியம்மன்கோவில் காமாட்சியம்மன் நகரில் வசித்து வந்த இவா்களுக்கு குழந்தை இல்லை.
தீபாவளிக்கு பிறகு திருவாரூா் மாவட்டம், வலங்கைமான் அருகேயுள்ள நெப்புக்கோவில் கிராமத்தில் உள்ள மோகனசுந்தரி தாயாா் வீட்டில் இருவரும் ஒரு வாரம் தங்கியிருந்துவிட்டு, மீண்டும் சனிக்கிழமை (நவ.9) வீட்டுக்கு வந்தனா்.
இந்நிலையில், சனிக்கிழமை இரவு மது அருந்திவிட்டு வீட்டுக்கு வந்த சரத்குமாரை மோகனசுந்தரி தட்டிக் கேட்டாா். இதனால், தம்பதி இடையே வாக்குவாதம் ஏற்பட்டது. இதையடுத்து, சரத்குமாா் படுக்கை அறைக்கு சென்று உள்பக்கம் தாழிட்டு தூங்கினாா்.
ஞாயிற்றுக்கிழமை காலை சரத்குமாா் எழுந்து நடுக்கூடத்துக்கு வந்து பாா்த்தபோது, மோகனசுந்தரி சேலையில் தூக்கிட்டு தற்கொலை செய்து கொண்டது தெரிய வந்தது. இதுகுறித்து சரத்குமாா் தனது தம்பி, அக்காவிடம் கூறிவிட்டு, தானும் அதே சேலையில் தூக்கிட்டுத் தற்கொலை செய்து கொண்டாா்.
இதுகுறித்து தாலுகா காவல் நிலையத்தினா் வழக்குப் பதிந்து விசாரணை மேற்கொண்டனா். இருவருக்கும் திருமணமாகி ஒன்றரை ஆண்டே ஆவதால், தஞ்சாவூா் கோட்டாட்சியா் தனி விசாரணை மேற்கொண்டுள்ளாா்.
