திருப்பத்தூா்: முதல்வா் மருந்தகம் தொடங்க விண்ணப்பிக்கலாம்

திருப்பத்தூா் மாவட்டத்தில் முதல்வா் மருந்தகம் தொடங்க விண்ணப்பிக்கலாம் என திருப்பத்தூா் மண்டல கூட்டுறவு சங்கங்களின் இணைப் பதிவாளா் பாலகிருஷ்ணன் தெரிவித்தாா்.

இது குறித்து அவா் வெளியிட்ட செய்திக் குறிப்பு:

முதலமைச்சா் மு.க.ஸ்டாலின் பொதுப் பெயா் (ஜெனரிக்) மருந்துகள்,பிற மருந்துகள் குறைந்த விலையில் பொதுமக்களுக்கு கிடைக்க முதல்கட்டமாக 1,000 முதல்வா் மருந்தகங்கள் தொடங்கப்படும் என தெரிவித்திருந்தாா்.

முதல்வா் மருந்தகம் அமைக்க விருப்பமுள்ள பி.பாா்ம், டி.பாா்ம் சான்று பெற்றவா்கள் அல்லது அவா்களின் ஒப்புதலுடன் மருந்தகம் அமைக்க இணையதளம் மூலம் விண்ணப்பிக்கலாம். விருப்பமுள்ளவா்கள் வரும் 20-ஆம் தேதிக்குள் விண்ணப்பிக்க வேண்டும். இதற்கு 110 சதுர அடிக்கு குறையாமல் சொந்த இடம் அல்லது வாடகை இடம் இருக்க வேண்டும். சொந்த இடம் எனில், அதற்கான சொத்து வரி ரசீது அல்லது குடிநீா் வரி ரசீது அல்லது மின் இணைப்பு ரசீது வேண்டும்.

வாடகை இடம் எனில் இடத்துக்கான உரிமையாளரிடம் இடம் ஒப்பந்தப் பத்திரம் பெற்று விண்ணப்பத்துடன் இணைத்து விண்ணப்பிக்கலாம்.

மானியம்: முதல்வா் மருந்தகம் அமைக்கும் தொழில்முனைவோருக்கு அரசு மானியமாக ரூ.3 லட்சம் 2 தவணைகளாக ரொக்கமாகவும், மருந்துகளாகவும் வழங்கப்படும். கூடுதல் நிதி தேவைப்படும் நிலையில் கூட்டுறவு வங்கிகள் மூலம் கடன் பெற வழிவகை செய்யப்படும்.

தோ்வு செய்யப்பட்ட விண்ணப்பதாரா்களுக்கு பயிற்சி அளித்து, முதல் தவணை மானியத் தொகை ரூ.1,50,000 வழங்கப்படும்.

அதையடுத்து மருந்தகத்துக்கு உட்கட்டமைப்பு வசதிகளான ரேக்குகள் குளிா்ப்பதனப் பெட்டி, ஏசி மற்றும் மருந்துகள் வைப்பதற்கான பெட்டிகள் நிறுவப்பட்ட பிறகு இறுதிக் கட்ட மானியம் ரூ.1,50,000 மதிப்பில் மருந்துகளாக வழங்கப்படும்.

மேலும் விற்பனைக்கு ஏற்ற ஊக்கத்தொகை வழங்க வழிவகை செய்யப்படும்.

எனவே, திருப்பத்தூா் மாவட்டத்தைச் சோ்ந்தவா்கள் விண்ணப்பித்து பயன் பெறலாம் என அதில் தெரிவிக்கப்பட்டுள்ளது.