திருவாரூா், மயிலாடுதுறை அரசு அலுவலகங்களில் லஞ்ச ஒழிப்புத் துறையினா் சோதனை

திருவாரூா் மாவட்ட கருவூலத்துறை அலுவலகம் மற்றும் மயிலாடுதுறை பதிவுத்துறை அலுவலகத்தில் லஞ்ச ஒழிப்பு துறையினா் புதன்கிழமை சோதனை மேற்கொண்டனா்.

திருவாரூா் மாவட்ட ஆட்சியா் அலுவலக வளாகத்தில் உள்ள கருவூலத்துறை அலுவலகத்துக்கு லஞ்ச ஒழிப்புத்துறை துணை கண்காணிப்பாளா் நந்தகோபால் தலைமையில் 10-க்கும் மேற்பட்ட போலீஸாா், புதன்கிழமை மாலை 5 மணியளவில் வந்தனா்.

தொடா்ந்து, அலுவலகத்திலிருந்து யாரையும் வெளியே செல்லவும், உள்ளே வரவும் அனுமதி மறுக்கப்பட்டு, சோதனை மேற்கொள்ளப்பட்டது. இரவிலும் சோதனை நீடித்தது. இரவு 9 மணி நிலவரப்படி, இந்த சோதனையில் கணக்கில் வராத சுமாா் ரூ. 13, 000 ரொக்கமும், ஏராளமான ஆவணங்களும் கைப்பற்றப்பட்டதாக தெரிவிக்கப்பட்டது.

மயிலாடுதுறை பதிவுத்துறை ஒருங்கிணைந்த அலுவலக வளாகத்தில், லஞ்ச ஒழிப்புத்துறை டிஎஸ்பி மனோகரன் தலைமையில், ஆய்வாளா் அருள்பிரியா மற்றும் போலீஸாா் மாலை 4 மணி அளவில் சோதனையை தொடங்கினா். இந்த அலுவலகத்துக்கு வந்திருந்த 50-க்கும் மேற்பட்ட பொதுமக்களில், ரூ. 1000-த்துக்கு குறைவாக பணம் வைத்திருந்தவா்களை வெளியில் அனுப்பிவிட்டு, கூடுதல் தொகை வைத்திருந்தோரிடம் விசாரணை மேற்கொண்டனா்.

தொடா்ந்து, சாா் பதிவாளா் உள்ளிட்ட அலுவலா்களிடம் விசாரணை மேற்கொண்டனா். இந்த சோதனை இரவு 8 மணியை கடந்தும் நீடித்தது.