தில்லி பேரவைத் தேர்தல் அறிவிப்புக்கு முன்பே வேட்பாளர் பட்டியலை வெளியிட்ட ஆம் ஆத்மி!

புது தில்லி: தில்லி பேரவைத் தேர்தல் 2025ஆம் ஆண்டு தொடக்கத்தில் நடைபெறலாம் என எதிர்பார்க்கப்படும் நிலையில், தேர்தல் தேதி அறிவிப்புக்கு முன்பே, முதல் கட்ட வேட்பாளர் பட்டியலை ஆம் ஆத்மி வெளியிட்டுள்ளது.

தில்லி பேரவைத் தேர்தலுக்கான 11 வேட்பாளர்களைக் கொண்ட முதல் பட்டியல் இன்று வெளியிடப்பட்டுள்ளது. கட்சியின் தேசிய ஒருங்கிணைப்பாளர் அரவிந்த் கேஜரிவால் தலைமையில் நடைபெற்ற அரசியல் விவகாரக் குழுக் கூட்டத்தில் வேட்பாளர்களின் பெயர்கள் இறுதி செய்யப்பட்டதாகவும் கூறப்படுகிறது.

தற்போது, இந்த 11 தொகுதிகளிலும், ஆம் ஆத்மி எம்எல்ஏக்கள் யாரும் இல்லை என்று கட்சித் தலைவர் கோபால் ராய் கூறியிருக்கிறார்.

இந்த முதல் வேட்பாளர் பட்டியலில், பாஜக தலைவர்கள் பிராம் சிங் தன்வார், அனில் ஜா, பி.பி தியாகி மற்றும் முன்னாள் காங்கிரஸ் தலைவர்கள் சௌத்ரி சுபைர் அகமது, வீர் திங்கன், சுமேஷ் ஷோகீன் ஆகியோர் இடம்பெற்றுள்ளனர்.