நெசவாளா்கள் போராட்டம்: தேமுதிக ஆதரவு

மே 19-ஆம் தேதி நெசவாளா்கள் நடத்தும் போராட்டத்துக்கு ஆதரவு அளிப்பதாக தேமுதிக பொதுச்செயலா் பிரேமலதா விஜயகாந்த் தெரிவித்துள்ளாா்.

இதுகுறித்து அவா் வெள்ளிக்கிழமை வெளியிட்ட அறிக்கை:

கோவை, திருப்பூா் ஆகிய மாவட்டங்களில் நெசவுத் தொழிலை சாா்ந்திருக்கும் குறு, சிறு தொழிலாளா்கள் ஆா்ப்பாட்டம் நடத்தி வருகின்றனா். மேலும், மே 19-இல் மீண்டும் நெசவுத் தொழிலாளா்களின் கோரிக்கையை வலியுறுத்தி ஆா்ப்பாட்டம் நடத்துவதற்கு தேமுதிக ஆதரவு அளிக்கிறது. புதிய நெசவுக் கூலி உயா்வு பிரச்னையில், முத்தரப்பு பேச்சுவாா்த்தை நடத்தி தீா்வுகாண வலியுறுத்தி காலவரையற்ற வேலை நிறுத்தம் செய்து வருகின்றனா்.

மேலும், விசைத்தறி தொழிலைப் பாதுகாக்க தமிழக அரசு உடனடியாக தலையிட்டு, நெசவுத் தொழிலாளா்களின் பிரச்னையை சுமுகமாக தீா்த்து அவா்களின் தொழிலுக்கும் வாழ்வாதாரத்துக்கும் வழிவகை செய்ய வேண்டும்.

மின் கட்டண உயா்வு, அத்தியாவசியப் பொருள்களின் விலைவாசி உயா்வுகளை திரும்பப்பெற்று, நெசவாளா்களுக்கு வாழ்வாதாரத்தை உறுதிசெய்ய வேண்டும் எனத் தெரிவித்துள்ளாா்.