திருவாரூா்: பயிா்க் காப்பீட்டுத் திட்டத்தை அரசே ஏற்று நடத்த வேண்டும் எனக் கோரிக்கை விடுக்கப்பட்டுள்ளது.
திருவாரூா் அருகே புலிவலத்தில் மாா்க்சிஸ்ட் கம்யூனிஸ்ட் கட்சியின் 24 ஆவது ஒன்றிய மாநாடு நிா்வாகிகள் வி. ராஜாங்கம், எஸ். திரிபுரா ஆகியோா் தலைமையில் திங்கள்கிழமை நடைபெற்றது. இதையொட்டி, காட்டாற்று பாலத்திலிருந்து பேரணியாகப் புறப்பட்டு, கோரிக்கைகளை முழங்கியபடி மாநாடு நடைபெறுமிடத்துக்கு வந்தனா்.
கட்சியின் மாவட்டச் செயலாளா் ஜி. சுந்தரமூா்த்தி, சிஐடியு மாவட்டச் செயலாளா் டி. முருகையன், தமிழ்நாடு விவசாயிகள் சங்க மாவட்டச் செயலாளா் எம். சேகா், மூத்த உறுப்பினா் பி. மாதவன் ஆகியோா் கொடியேற்றும் நிகழ்வில் பங்கேற்றனா்.
மாவட்ட செயற்குழு உறுப்பினா் கே.ஜி. ரகுராமன், மாநாட்டை தொடக்கி வைத்துப் பேசினாா். ஒன்றியச் செயலாளா் என். இடும்பையன் வேலை அறிக்கை வாசித்தாா். மாவட்ட செயற்குழு உறுப்பினா் பா. கோமதி வாழ்த்திப் பேசினாா்.
கூட்டத்தில், புதிய உறுப்பினா்கள் தோ்வு செய்யப்பட்டனா். அதன்படி, 13 ஒன்றியக்குழு உறுப்பினா்களும், புதிய ஒன்றியச் செயலாளராக பிஆா்எஸ். சுந்தரைய்யாவும் தோ்ந்தெடுக்கப்பட்டனா். நிகழ்வில், மாநிலக்குழு உறுப்பினா் ஐவி. நாகராஜன் பங்கேற்று, புதிய உறுப்பினா்களை அறிமுகப்படுத்திப் பேசினாா்.
தீா்மானங்கள்: பாதுகாக்கப்பட்ட வேளாண் மண்டலத்தில் சிப்காட் தொழிற்சாலையை தடை செய்ய வேண்டும். 100 நாள் வேலையை நிரந்தரமாக வழங்கி அரசு அறிவித்த சட்டக்கூலி ரூ.319 ஐ வழங்க வேண்டும். 2023-2024 ஆம் ஆண்டுக்கான பயிா்க் காப்பீட்டுத் தொகை, அனைத்து விவசாயிகளுக்கும், விடுபடாமல் வழங்க வேண்டும். பெருங்குடி ஊராட்சியில் உள்ள காட்டாற்றில் கான்கிரீட் பாலம் அமைக்க வேண்டும் என்பன உள்ளிட்ட பல்வேறு தீா்மானங்கள் இம்மாநாட்டில் நிறைவேற்றப்பட்டன.
