ஈரோடு கிழக்கு தொகுதி இடைத்தோ்தலை முன்னிட்டு நடைபெற்ற வாகனச் சோதனையில் பறிமுதல் செய்யப்பட்ட ரூ.5.52 லட்சம் சம்பந்தப்பட்டவா்களிடம் திரும்ப ஒப்படைக்கப்பட்டது.
ஈரோடு கிழக்கு தொகுதி இடைத்தோ்தலில் பறக்கும் படையினா் வாகனச் சோதனையில் ஈடுபட்டு வருகின்றனா். இவா்கள், 5 பேரிடம் இருந்து உரிய ஆவணங்களின்றி கொண்டு செல்லப்பட்ட ரூ.5.52 லட்சம் ரொக்கத்தை பறிமுதல் செய்து, கருவூலத்தில் செலுத்தி இருந்தனா். அவா்கள் 5 பேரும் உரிய ஆவணங்களை சமா்ப்பித்ததால், மாவட்ட தோ்தல் அலுவலா் ராஜகோபால் சுன்கரா உத்தரவுப்படி பணம் உரியவா்களுக்கு முழுமையாக திரும்ப ஒப்படைக்கப்பட்டது.
இதன்படி, நிா்மலா என்பவரிடம் ரூ.50,860, முஸ்தபாவிடம் ரூ. 1 லட்சம், சண்முகத்திடம் ரூ.1.80 லட்சம், பப்லு என்பவரிடம் ரூ.1.22 லட்சம், சரவணனிடம் ரூ. 1 லட்சம் என பறிமுதல் செய்யப்பட்ட பணம் ஒப்படைக்கப்பட்டது.
