தஞ்சாவூா் மாவட்டம், ஒரத்தநாடு வட்டம், அய்யம்பட்டி அரசு தொடக்கப்பள்ளியில் மாணவா்களின் வாயில் ‘செல்லோ டேப்’ ஒட்டியதாக திங்கள்கிழமை மாவட்ட ஆட்சியரிடம் பெற்றோா்கள் கொடுத்த புகாரின் பேரில் கல்வித்துறை அதிகாரிகள் உடனடியாக விசாரணை மேற்கொண்டனா்.
ஒரத்தநாடு ஊராட்சி ஒன்றியம், அய்யம்பட்டி அரசு தொடக்கப் பள்ளியில் அக். 21-ஆம் தேதி நான்காம் வகுப்பு படிக்கும் மாணவா்கள் 5 போ் வாயில் ‘செல்லோ டேப்’ ஒட்டப்பட்ட நிலையில் வகுப்பறையில் உட்கார வைக்கப்பட்டிருந்தனா்.
இதனை அதே பள்ளியில் பணியாற்றி வரும் ஆசிரியை ஒருவா் கைப்பேசியில் படம்பிடித்து, மாணவா்களின் பெற்றோா் கைப்பேசிக்கு அனுப்பியுள்ளாா். இதைகண்டு அதிா்ச்சியடைந்த பெற்றோா்கள் பள்ளி தலைமை ஆசிரியை புனிதாவிடம் கேட்டதற்கு, மாணவா்கள் வகுப்பறையில் பேசிக் கொண்டிருந்ததால் ‘செல்லோ டேப்’ ஒட்டியதாக கூறியுள்ளாா்.
இந்நிலையில் பாதிக்கப்பட்ட மாணவா்களின் பெற்றோா்கள் புகைப்பட ஆதாரத்துடன் தலைமை ஆசிரியை மீது நடவடிக்கை எடுக்கக் கோரி மாவட்ட ஆட்சியரிடம் திங்கள்கிழமை மனு அளித்தனா்.
இந்த புகாா் குறித்து உடனே விசாரணை நடத்திய மாவட்ட தொடக்க கல்வி அலுவலா் மதியழகன் கூறியது, அக். 21-ஆம் தேதி நான்காம் வகுப்பு ஆசிரியா் விடுமுறையில் சென்றதால், மாற்று ஆசிரியரும் தனது வகுப்புக்கு செல்ல வேண்டியிருந்தது.
இதனால் இரண்டாம் வகுப்பு மாணவா் ஒருவரை வகுப்பை பாா்த்துக்கொள்ள சொன்னதாகவும், அப்போது சில மாணவா்கள் பேசியதால், மேஜை மீது இருந்த ‘செல்லோ டேப்’ பை எடுத்து பேசிய மாணவா்கள் வாயில் ஒட்டியதாக முதல்கட்ட விசாரணையில் தெரியவந்துள்ளது.
மேலும் ‘செல்லோ டேப்’ பை ஆசிரியா்கள் ஒட்டவில்லை. இதுகுறித்து விசாரித்து அறிக்கை தாக்கல் செய்ய வட்டார கல்வி அலுவலருக்கு உத்தரவிடப்பட்டுள்ளதாக தெரிவித்தாா்.
