'பாஜக தொடர்பு... கட்சியை அழித்துவிட்டார்' - மயூரா ஜெயக்குமாருக்கு எதிராக கொதிக்கும் கோவை கதர்கள்

கடந்த 20.10.2024 அன்று கோவை மாநகர காங்கிரஸ் கமிட்டி சார்பில், 'கோவை காங்கிரஸ் கட்சியைக் காப்போம் காங்கிரஸ் கட்சியை வளர்ப்போம்' என்ற தலைப்பில் சிறப்புக் கூட்டம் நடைபெற்றது. இதில் நிர்வாகிகள் பலர் கலந்து கொண்டனர். கூட்டத்தில், "தேசிய செயலாளர் மயூரா ஜெயக்குமார் தனது உதவியாளரான கருப்பசாமிக்கு கோவை மாநகர் மாவட்ட காங்கிரஸ் கமிட்டி தலைவர் பதவியை வாங்கி கொடுத்திருக்கிறார். இதனால் கட்சி அவருடைய கட்டுப்பாட்டில் இருக்கிறது. உண்மை தொண்டர்களை புறக்கணித்து வருகிறார். கட்சியின் மீது ஈடுபாடு இல்லாத நபர்களை பதவிக்கு கொண்டுவருகிறார். காங்கிரஸ் கட்சியின் சித்தாந்தத்திற்கு எதிராக செயல்படுகிறார்.

தலைவர் ராகுல் காந்திக்கு துரோகம் விளைவிக்கும் செயல்களை அரங்கேற்றி வருகிறார். தமிழ்நாடு சட்டப் பேரவைத் தேர்தலில் 2011, 2016 மற்றும் 2021-ம் ஆண்டுகளில் போட்டியிட்டு மூன்று முறையும் தோல்வி அடைந்தார். கோவை மாவட்ட காங்கிரஸ் கமிட்டியின் ஒட்டுமொத்த வளர்ச்சியையும் அதிகார துஷ்பிரயோகம் செய்து ஆட்டம் காண வைக்கிறார். எனவே அவரை உடனடியாக அகில இந்திய காங்கிரஸ் செயலாளர் பதவியில் இருந்து நீக்க வேண்டும். அப்போதுதான் கோவை மாவட்ட காங்கிரஸ் கட்சி வளர்ச்சியடையும்" என தீர்மானம் நிறைவேற்றப்பட்டது. தொடர்ந்து மயூரா மீது நடவடிக்கை எடுக்க வேண்டும் என வலியுறுத்தி டெல்லிக்கும் புகார் கடிதங்களை அனுப்பியிருக்கிறார்கள்.

இதுகுறித்து நம்மிடம் பேசிய கோயம்புத்தூர் இளைஞர் காங்கிரஸ் தலைவர் உதயகுமார், "ஒருகாலத்தில் கோவை காங்கிரஸின் கோட்டையாக இருந்தது. குப்புசாமி, பிரபு போன்றவர்கள் எம்.பி-க்களாக இருந்திருக்கிறார்கள். இவர்கள் சைலெண்டானா பிறகுதான் மயூரா ஜெயக்குமாரின் ஆட்டம் அதிகரித்து விட்டது. தலைவர்களை கையில்போட்டு கொண்டு இளைஞர்கள் காங்கிரஸ் தலைவர், மாவட்ட தலைவர், செயல் தலைவர் போன்ற பதவிகளை தனதாக்கிக் கொண்டார். இந்த சூழலில்தான் தனது உதவியாளரான கருப்பசாமி என்பவருக்கு கோவை மாநகர் மாவட்ட காங்கிரஸ் கமிட்டியின் தலைவர் பதவியை வாங்கி கொடுத்திருக்கிறார். ஆனால் பி.எஸ். சரவணகுமார், செல்வராஜ், ராதாகிருஷ்ணன் என பலர் பா.ஜ.க-வை எதிர்த்து அரசியல் செய்யும் தலைவர்கள் அதிகமாக இருக்கிறார்கள்.

அவர்களில் ஒருவரைத்தான் மாவட்ட தலைவராக நியமித்திருக்க வேண்டும். இதற்கு டெல்லி லாபி மூலமாக மயூரா முட்டுக்கட்டை போட்டுவிட்டார். கருப்பசாமி நடத்தும் நிகழ்ச்சிகளுக்கு முக்கிய நிர்வாகிகளை அழைப்பதில்லை. சமீபத்தில் கூட தலைவர் ராகுல் காந்தியை அவதூறாக பா.ஜ.க-வினர் பேசினார்கள். அதற்கு எதிர்ப்பு தெரிவித்து கோவையில் ஆர்ப்பாட்டம் நடத்தினார்கள். அதற்கு கூட எங்களை அழைக்கவில்லை. இதற்கு மயூராவின் தூண்டுதல்தான் காரணம். இதுபோல பல விஷயங்களை எடுத்துக்காட்டாக சொல்ல முடியும். கடத்த நாடாளுமன்ற தேர்தலின் போதும் எங்களை அழைக்காமல் தனியாக சென்று ஒட்டு கேட்டார்கள். கோவையில் பா.ஜ.க வளர்ந்து வரும் சூழலில் காங்கிரஸின் நிலைமை மிகவும் மோசமாக இருக்கிறது. அகில இந்திய தலைமை இதில் கவனம் செலுத்த வேண்டும்" என்றார்.

தொடர்ந்து பேசிய கோயம்புத்தூர் சீனியர் கதர்கள், "மயூரா கடந்த 2000-ம் ஆண்டுதான் காங்கிரஸுக்கு வருகிறார். பிறகு கோவை மாவட்ட காங்கிரஸ் தலைவர் பதவியை பிடிக்கிறார். தமிழக காங்கிரஸ் தலைவராக வாசன் இருந்த காலகட்டத்தில் அவருடன் நெருக்கம் காட்டுகிறார். அதன் மூலமாக தமிழ்நாடு இளைஞர் காங்கிரஸ் தலைவர் பதவியை பிடிக்கிறார். அந்த பதவிக்கு கார்த்தி சிதம்பரம் தீவிரமாக முயற்சி மேற்கொண்டு வந்தார். வாசனின் ஆதரவு இருந்தால் மயூராவுக்குத்தான் பதவி கிடைக்கிறது. இப்படி கார்த்திக்கு எதிராக வேலை செய்தவர், பின்னாளில் அவருடன் இணைந்து கொண்டார். அதில் சிங்காநல்லூர் தொகுதியில் மயூரா போட்டியிட கார்த்தி சீட் பெற்று கொடுக்கிறார். சரியாக வேலை செய்யாததால் தோல்வியடைந்தார். இதற்கிடையில் முகுல் வாஸ்னிக்குடன் தொடர்பை ஏற்படுத்திக்கொள்கிறார்.

அதன் மூலமாக 2016 தேர்தலில் கோவை தெற்கு தொகுதியில் போட்டியிட சீட் கிடைக்கிறது. இதிலும் மயூராவுக்கு தோல்விதான் கிடைக்கிறது. 2021 தேர்தலின்போதும் கோவை தெற்கில் நின்றும் தோல்விதான் கிடைத்தது. அப்போது வானதி, கமலஹாசன் களத்தில் இருந்தார்கள். எனவே தொகுதியில் செல்வாக்கு உள்ளவர்களுக்கு சீட் கொடுங்கள் என பலமுறை சொல்லி பார்த்தோம். ஆனால் கட்சி தலைமை செவி கொடுத்து கேட்கவில்லை. இதன் விளைவு கோவையில் தி.மு.க-வே போட்டியிடுவதாக சொல்லிவிட்டது. இந்த சூழலில்தான் அமைப்பு பொதுச் செயலாளர் கே.சி.வேணுகோபால் மூலமாக தொடர்பை வளர்த்துக் கொள்கிறார். இதன் மூலமாக கோவை மாநகர் மாவட்ட தலைவராக வருகிறார். பின்னர் தலைவராக வந்த கே.எஸ்.அழகிரியின் உதவியுடன் செயல் தலைவராகிறார். அதிலிருந்து தேசிய செயலாளராகவும் ஆகிவிடுகிறார். இப்படி உழைக்காமலேயே பதவிகளுக்கு வருகிறார். கோவையில் பா.ஜ.க வளர்வதற்கு மயூராவின் செயல்பாடுதான் முக்கிய காரணம். அவர்களுடன் தொடர்பு வைத்திருக்கிறார். எனவே மயூரா மீது நடவடிக்கை எடுக்க வேண்டும்" என்றனர்.

இறுதியாக குற்றச்சாட்டுக்கள் குறித்து மயூரா ஜெயக்குமாரிடமே விளக்கம் கேட்டோம், "நான் கட்சியில் தேசிய செயலாளராகவும், கர்நாடக மாநில பொறுப்பாளராகவும் இருக்கிறேன். நான் வேலை செய்கிறேனா இல்லையா என்பது கர்நாடக காங்கிரஸ் அல்லது அகில இந்திய தலைமைதான் முடிவு செய்ய வேண்டும். அதேநேரத்தில் எனக்கு எதிராக மாவட்ட, மாநில காங்கிரஸ் கமிட்டியில் தீர்மானம் நிறைவேற்றவில்லை. சம்மந்தமே இல்லாமல் கோவை வடக்கு மாவட்ட தலைவர் சூலூர் மனோகரன், தெற்கு மாவட்ட தலைவர் பகவதியும் என்னை கட்சியில் இருந்து நீக்க வேண்டும் என தீர்மானம் நிறைவேற்றியிருக்கிறார்கள். யாருடையவோ தூண்டுதலில்தான் இது நடந்துள்ளது. எந்த பிரச்னையாக இருந்தாலும் தலைமைக்குதான் புகார் அளிக்க வேண்டும். தன்னிச்சையாக தீர்மானம் நிறைவேற்றுவது ஒழுங்கீனமற்ற செயல். இதுகுறித்து தலைமைக்கு புகார் அளித்திருக்கிறேன். நான் உண்மையான காங்கிரஸ் தொண்டன். எனவே பா.ஜ.க-வுடன் தொடர்பு வைத்திருக்கிறேன் என சொல்வது முட்டாள் தனமான பேச்சு. கருப்பசாமி பல ஆண்டுகளாக கட்சியில் இருக்கிறார். அவர் சாதாரண குடும்பத்தை சேர்ந்தவர். எனவே அவருக்கு பதவி கிடைத்துவிட்டது என்கிற பொறாமையில் பணக்காரர்கள் எல்லாம் இப்படி செய்கிறார்கள்" என்றார்.

தேசிய அளவிலோ, மாநில அளவிலோ, மாவட்ட அளவிலோ... காங்கிரஸையும் கோஷ்டி பூசலையும் பிரிக்கவே முடியாது போல என காங்கிரஸ் கட்சியினர் வேதனை தெரிவிக்கிறார்கள்.!