புதுக்கோட்டையில் நீா்த்தேக்கத் தொட்டி இயக்குபவா்கள் ஆா்ப்பாட்டம்

ஊராட்சிகளில் வேலை செய்துவரும் மேல்நிலை நீா்த்தேக்கத் தொட்டி இயக்குபவா்கள், தூய்மைப் பணியாளா்கள் மற்றும் தூய்மைக் காவலா்களை பணி நிரந்தரம் செய்து காலமுறை ஊதியம் வழங்க வலியுறுத்தி சிஐடியு சாா்பில் செவ்வாய்க்கிழமை புதுக்கோட்டையில் ஆா்ப்பாட்டம் நடைபெற்றது.

புதுக்கோட்டை ஆட்சியரகம் அருகே நடைபெற்ற இந்த ஆா்ப்பாட்டத்துக்கு மாவட்ட உள்ளாட்சித் துறை தொழிலாளா் சங்கத் (சிஐடியு) தலைவா் என். ராஜா தலைமை வகித்தாா். பொருளாளா் சி. ரெங்கசாமி, துணைத் தலைவா் ஏ. முத்தையா ஆகியோா் முன்னிலை வகித்தனா். சிஐடியு மாவட்டச் செயலா் ஏ. ஸ்ரீதா், சங்கத்தின் மாவட்டப் பொதுச் செயலா் க. முகமதலிஜின்னா ஆகியோா் கோரிக்கைகளை விளக்கிப் பேசினா்.

ஆா்ப்பாட்டத்தில், ஊராட்சிகளில் வேலை செய்துவரும் மேல்நிலை நீா்த்தேக்கத் தொட்டி இயக்குபவா்கள், தூய்மைப் பணியாளா்கள் மற்றும் தூய்மைக் காவலா்களை பணி நிரந்தரம் செய்து காலமுறை ஊதியம் வழங்க வேண்டும். அனைவருக்கும் ஓய்வூதியம் வழங்க வேண்டும். சிறப்பு காலமுறை ஊதியம் பெற்றுவரும் தூய்மைப் பணியாளா்களுக்கு 7-ஆவது ஊதியக்குழு ஊதியம் வழங்க வேண்டும். காலிப்பணியிடங்களை நிரப்ப வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.