தேர்தலில் அமெரிக்காவைவிட இந்தியா மேலானது!! அமெரிக்காவை விமர்சித்த எலான்!
நோய் பாதிப்பால் உயிரிழந்த மனைவியின் ரூ.90 ஆயிரம் கடனை தள்ளுபடி செய்து உத்தரவிட்ட திருச்சி ஆட்சியருக்கு காந்திசந்தை கூலித் தொழிலாளி சனிக்கிழமை நன்றி தெரிவித்தாா்.
திருச்சி பாலக்கரை பகுதியைச் சோ்ந்தவா் மோகன் (42). சுமை தூக்கும் தொழிலாளியான இவா் காந்தி சந்தையில் வேலை பாா்க்கிறாா். இவரது மனைவி வள்ளி (36), குடும்பத் தேவைக்காக மகளிா் குழுவில் கடன் வாங்கியிருந்த நிலையில் அவருக்கு உடல் நலக்குறைவு ஏற்பட்டது. இதையடுத்து தனது மனைவியை திருச்சி, சென்னை, புதுச்சேரி உள்ளிட்ட பல்வேறு அரசு மருத்துவமனைகளுக்கு அழைத்துச் சென்று மோகன் சிகிச்சை அளித்தும் வள்ளி உயிரிழந்தாா்.
இதையடுத்து அவா் வாங்கிய கடன் தொகை வட்டி உள்பட ரூ.90 ஆயிரத்தைக் கேட்டு மகளிா் குழு நிா்வாகிகள் மோகனிடம் வற்புறுத்தி வந்தனா்.
இதனால் விரக்தியடைந்த மோகன் மாவட்ட ஆட்சியரகத்தில் அண்மையில் நடைபெற்ற குறைதீா் கூட்டத்தில் மனு அளித்து, மனைவியின் சிகிச்சைக்காக ஏற்கெனவே கடன் வாங்கி செலவு செய்த நிலையில், தற்போது தினமும் வாழ்வாதாரத்திற்கே போராடுவதாகவும், மகனை நன்றாக படிக்க வைக்க வேண்டும் எனவும் ஆட்சியரிடம் உதவி கோரினாா். மனைவி பெற்ற கடனை தள்ளுபடி செய்யவும் கோரிக்கை விடுத்தாா்.
இவரது மனுவை ஏற்றுக் கொண்ட ஆட்சியா் மா. பிரதீப்குமாா், கடன் தள்ளுபடிக்கு உத்தரவிட்டாா்.
இதையடுத்து, மகளிா் திட்ட அலுவலா்கள், மோகனை அழைத்து கடன் தள்ளுபடிக்கான ஆணையை சனிக்கிழமை வழங்கினா். அதைப் பெற்றுக் கொண்ட அவா், கண்ணீா் மல்க ஆட்சிருயருக்கு நன்றி தெரிவித்தாா்.
அப்போது அரசுப் பள்ளியில் 9ஆம் வகுப்பு படிக்கும் அவரது மகன் காா்த்தி (16) கூறுகையில், எனது தாய் ரத்தப் புற்றுநோயால் உயிரிழந்தாா். எங்களிடம் பணம் இல்லாததால் அவரைக் காப்பாற்ற முடியவில்லை. எனவே நான் நன்றாக படித்து, மருத்துவா் ஆக விரும்புகிறேன். அரசு உறுதுணையாக இருந்தால் மருத்துவராகி ஏழைகளுக்கு இலவச சிகிச்சை அளிப்பேன் என்றாா் அவா்.
