மாணவா்களின் முன்னேற்றத்துக்கு துணை நிற்கும் முதல்வா்: அமைச்சா் அன்பில் மகேஸ் பொய்யாமொழி

மாணவா்களின் முன்னேற்றத்துக்கு எப்போதும் துணை நிற்கும் முதல்வராக மு.க.ஸ்டாலின் உள்ளாா் என்று பள்ளிக் கல்வித் துறை அமைச்சா் அன்பில் மகேஸ் பொய்யாமொழி தெரிவித்தாா்.

ஈரோடு மாவட்டம், கோபிசெட்டிபாளையத்தில் திமுக மாணவா் அணி சாா்பில் தமிழ் மாணவா்கள் மன்ற தொடக்க விழா திங்கள்கிழமை நடைபெற்றது.

மாணவா் மன்றத்தைத் தொடங்கிவைத்து அமைச்சா் அன்பில் மகேஸ் பொய்யாமொழி பேசியதாவது: தமிழகத்தில் ஹிந்தி எதிா்ப்பு, ஈழ தமிழா் போராட்டம், நீட் தோ்வு மற்றும் தேசிய கல்விக் கொள்கை எதிா்ப்பு போராட்டங்கள் மாணவா்களின் எதிா்ப்பால்தான் வலுவடைந்தன.

மாணவா்கள் நமக்கென என்று இருந்துவிடாமல் நாட்டின் போக்கினைக் கண்காணிக்க வேண்டும். உங்கள் உரிமைகளை நிலைநாட்ட வேண்டும். உங்களுக்கு உதவ தமிழக அரசு உள்ளது.

பள்ளிக்கல்வியில் தொடங்கி கல்லூரி படிப்பை முடித்து வேலைக்கு செல்லும் வரை உணவு முதல் அனைத்தையும் பொறுப்புடன் மாணவா்களுக்கு தமிழக அரசு வழங்கி வருகிறது. மாணவா்களின் முன்னேற்றத்துக்காக புதுமைப் பெண், தமிழ்ப் புதல்வன் திட்டங்கள் செயல்படுத்தப்பட்டுள்ளன.

நான் முதல்வன் திட்டத்தின் மூலம் ஆயிரக்கணக்கான இளைஞா்கள் வேலைவாய்ப்பைப் பெற்றுள்ளனா். மாணவா்களின் முன்னேற்றத்துக்கு எப்போதும் துணை நிற்கும் முதல்வராக மு.க.ஸ்டாலின் இருந்து வருகிறாா் என்றாா்.