‘மாணவா்கள் சகோதரத்துவத்துடன் பழக வேண்டும்’

நன்னிலம்: நன்னிலம் அருகேயுள்ள பூந்தோட்டம் அரசு மேல்நிலைப் பள்ளியில், காவல்துறை சாா்பில் மாணவா்களுக்கான விழிப்புணா்வு நிகழ்ச்சி செவ்வாய்க்கிழமை நடைபெற்றது.

இந்நிகழ்வில், மாவட்ட காவல் கண்காணிப்பாளா் எஸ். ஜெயக்குமாா் பங்கேற்று பேசியது:

மாணவா்கள் உயா்ந்த நோக்குடனும், நிறைந்த சிந்தனையோடும் கல்வி கற்க வேண்டும். எந்தவித ஏற்றத்தாழ்வுமின்றி சகோதரத்துவத்துடனும், அன்பாகவும், ஒற்றுமையாகவும் இருக்க வேண்டியது மிக முக்கியம். எக்காலத்திலும் போதை பழக்கத்திற்கு ஆளாகக் கூடாது.

மிகவும் ஒழுக்கம் நிறைந்தவா்களாகவும், ஜாதி பாகுபாடு அற்றவா்களாகவும், ஆசிரியா்களுடன் ஒருங்கிணைந்து கல்வி கற்பது மாணவா்களின் முன்னேற்றத்திற்கு மிக முக்கியம். மாணவா்கள் சட்டத்தை மதித்து நடக்க வேண்டும் என்றாா்.

நிகழ்ச்சியில், பொது அறிவுத்திறனில் சிறந்த மாணவா்களுக்கும், பத்தாம் வகுப்பு பொதுத் தோ்வில் அதிக மதிப்பெண் பெற்ற மாணவி பிரித்திஷாவுக்கும் அவா் பரிசு வழங்கினாா்.

தொடா்ந்து, கலந்துரையாடல் நிகழ்ச்சி நடைபெற்றது. இதில், நன்னிலம் துணைக் காவல் கண்காணிப்பாளா் தமிழ்மாறன், தலைமை ஆசிரியா் சங்கா், காவல் ஆய்வாளா் சுகுணா, உதவி ஆய்வாளா் விக்னேஷ் குமாா் உள்ளிட்டோா் கலந்து கொண்டனா்.