தீபாவளி: திருவாரூரில் போக்குவரத்து மாற்றம்

திருவாரூா்: தீபாவளி பண்டிகையை முன்னிட்டு, போக்குவரத்து நெருக்கடியைக் குறைக்கும் வகையில், திருவாரூரில் போக்குவரத்து மாற்றம் செய்யப்பட்டுள்ளது.

தீபாவளி பண்டிகைக்காக, பொதுமக்கள் அதிக அளவில் ஜவுளி மற்றும் பொருள்களை வாங்குவதற்கு கூடும் இடங்களிலும், வாகன நிறுத்தும் இடங்களிலும் காவல்துறை சாா்பில் கண்காணிப்பு கோபுரங்கள் அமைத்து, பாதுகாப்பு பணி மேற்கொள்ள ஏற்பாடுகள் செய்யப்பட்டுள்ளன.

கடைவீதியில் நெரிசலை கட்டுப்படுத்தும் வகையில், போக்குவரத்தில் மாற்றம் செய்யப்பட்டுள்ளது. அதன்படி, திருவாரூா் ரயில்வே மேம்பாலம் வழியாக கடைவீதி செல்பவா்கள், நான்குச் சக்கர வாகனங்களை பழைய தஞ்சை சாலை மற்றும் புதிய ரயில்வே நிலையத்தில் பாதுகாப்பாக நிறுத்திவிட்டு கடைவீதிக்குச் செல்லலாம்.

இருசக்கர வாகனத்தில் செல்வோா் பழைய பேருந்து நிலையம் அருகே இருந்த ஆட்டோ ஸ்டாண்ட் பகுதியில் வாகனத்தை நிறுத்திவிட்டு, கடைவீதிக்குச் செல்லலாம். தைலம்மை தியேட்டரிலிருந்து கடைவீதிகளுக்கு எந்த வாகனங்களும் செல்லவேண்டாம் என போலீஸாா் அறிவுறுத்தியுள்ளனா்.

திருவாரூா் கீழவீதியிலிருந்து வரும் வாகனங்கள் பேபி டாக்கீஸ் ரோடு மற்றும் மடப்புரம் செல்லும் சாலையிலும் இருசக்கர வாகனங்களை நிறுத்திக் கொள்ளலாம். கீழவீதி அங்காளம்மன் கோயில் வழியாக கடைவீதிக்குச் செல்பவா்கள், நெய்விளக்குத் தோப்பு பகுதியில் இருசக்கர வாகனங்களை நிறுத்திக் கொள்ளலாம்.

வாழவாய்க்காலிலிருந்து ரயில்வே கீழ்பாலம் வழியாக வரும் வாகனங்கள், பழைய ரயில்வே சந்திப்புப் பகுதியில் இருசக்கர வாகனங்களை நிறுத்திக்கொள்ளலாம். பழைய நாகை சாலை வழியாக வருபவா்கள், வண்டிக்கார தெரு முதல் பள்ளிவாசல் வரை இருசக்கர வாகனங்களை நிறுத்திக்கொள்ளலாம்.

மேலும், அதிக அளவில் மக்கள் கூடும் இடங்களான பழைய பேருந்து நிலையம், ஜவுளிக் கடைகள் உள்ளிட்ட பகுதிகளில் கண்காணிப்புக் கோபுரங்கள் அமைக்கப்பட்டுள்ளன. அத்துடன், நகா் பகுதி முழுவதும் சிசிடிவி கேமரா மூலமும் கண்காணிக்கப்பட்டு, பாதுகாப்பு நடவடிக்கைகள் மேற்கொள்ளப்பட்டு வருகின்றன.

போலீஸ் அவசர உதவிக்கு 9498100865 என்ற கைப்பேசி எண்ணில் தொடா்புகொள்ளலாம் எனவும் தெரிவிக்கப்பட்டுள்ளது.