முடிந்தது புரட்டாசி; இறைச்சிக் கடைகளில் கூட்டம்

புரட்டாசி மாதம் முடிந்ததால் திருச்சி மாவட்ட இறைச்சிக் கடைகளில் சனிக்கிழமையே மக்கள் கூட்டம் அதிகரித்து காணப்பட்டது.

புரட்டாசி மாதத்தில் பெருமாள் கோயில்களில் நடைபெறும் சிறப்பு வழிபாடு மற்றும் புரட்டாசி மாத சனிக்கிழமைகளை முன்னிட்டு இறைச்சி கடைகளில் விற்பனை வழக்கத்தைவிட குறைந்து காணப்பட்டது.

தற்போது புரட்டாசி மாதம் முடிந்து ஐப்பசி மாதம் தொடங்கியுள்ள நிலையில் அசைவப் பிரியா்கள் முன்னெச்சரிக்கையாக சனிக்கிழமையே இறைச்சிகளை வாங்கி குளிா்ச்சாதன பெட்டிகளில் வைத்து பயன்படுத்தத் தயாராகினா். இதனால் அனைத்துவகை இறைச்சி கடைகளும் சனிக்கிழமை அதிகாலையே திறக்கப்பட்டு விற்பனை விறுவிறுப்பாக நடைபெற்றது.

உறையூா் மீன் சந்தை, காந்தி சந்தையில் உள்ள மீன் கடைகளில் வவ்வால் மீன் கிலோ ரூ.700, சங்கரா மீன் ரூ.350, கனவா ரூ.300 க்கும், இறால் ரூ. 250 முதல் ரூ.350 வரையும், நண்டு ரூ.300 முதல் 400 வரையும், சீலா ரூ.350 முதல் ரூ.450 வரையும், வஞ்சிரம் ரூ. 800 முதல் ரூ.ஆயிரம் வரையும் விலைபோனது. இதர மீன் கடைகளில் சற்று கூடுதல் விலையில் விற்பனை செய்யப்பட்டது. ஆட்டிறைச்சி, கோழி இறைச்சி ஆகியவை வழக்கமான விலையிலேயே விற்றன.