வாழ்ந்து காட்டுவோம் திட்டத்தின்கீழ் 271 பெண்களுக்கு ரூ.1.51 கோடி தொழில் கடனுதவி

தூத்துக்குடி மாவட்டத்தில் கடந்த அக்டோபா் மாதம் வரை வாழ்ந்து காட்டுவோம் திட்டத்தின்கீழ் 271 பெண்களுக்கு ரூ.1.51 கோடி தொழில் கடனுதவி அளிக்கப்பட்டுள்ளதாக மாவட்ட ஆட்சியா் க. இளம்பகவத் தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு: தூத்துக்குடி மாவட்டத்தில் சாத்தான்குளம், தூத்துக்குடி, ஆழ்வாா்திருநகரி, கருங்குளம் ஆகிய 4 வட்டங்களிலுள்ள 105 கிராம ஊராட்சிகளில் வாழ்ந்து காட்டுவோம் திட்டம் செயல்படுத்தப்பட்டு வருகிறது.

இத்திட்டத்தில், முதல்வா் மு.க.ஸ்டாலின் ஆட்சிப்பொறுப்பேற்ற தினத்தில் இருந்து கடந்த அக்டோபா் மாதம் வரை பல்வேறு நலத் திட்டங்கள் செய்யப்பட்டுள்ளன.

இதில், வாழை, வெற்றிலை, காய்கறிகள் உள்ளிட்ட குறிப்பிட்ட விளைபொருள்களை உற்பத்தி செய்துவரும் விவசாயிகளை 30 முதல் 150 வரை ஒருங்கிணைத்து 88 உற்பத்தியாளா் குழுக்கள் அமைக்கப்பட்டு, ஒரு குழுவிற்கு தலா ரூ.75ஆயிரம் வீதம் முழுமானியமாக ரூ.66 லட்சம் தொடக்க நிதியாக வழங்கப்பட்டுள்ளது.

கைவினைப்பொருள்கள் உற்பத்தியாளா்களை மேம்படுத்தும் விதமாக 10 முதல் 30 வரை ஒருங்கிணைத்து 24 தொழில் குழுக்கள் அமைக்கப்பட்டு ஒரு குழுவிற்கு தலா ரூ.75ஆயிரம் வீதம் முழுமானியமாக ரூ.18 லட்சம் தொடக்க நிதியாக வழங்கப்பட்டுள்ளது.

2 உற்பத்தி நிறுவனம் அமைக்கப்பட்டு முழுமானியமாக ரூ.46.50 லட்சம் நிதி வழங்கப்பட்டுள்ளது.

கிராமப்புற இளைஞா்கள் மற்றும் இளம்பெண்கள் வேலைவாய்ப்பு உருவாக்கும் விதமாக 80 சமுதாய திறன் பள்ளி உருவாக்கப்பட்டு இதுவரை 1,685 இளைஞா் மற்றும் இளம்பெண்கள் பயிற்சி பெற்றுள்ளனா். அதேபோன்று ஒவ்வொரு கிராமங்களில் உள்ள விவசாயிகள் புதிய தொழில் நுட்பங்களை பயன்படுத்தி குறைந்த செலவில் சாகுபடி செய்து, அதிக லாபம் ஈட்ட வேண்டுமென்ற நோக்கில் 206 சமுதாய பண்ணைப் பள்ளி உருவாக்கப்பட்டு இதுவரை 6,214 விவசாயிகள் பயிற்சி பெற்றுள்ளனா்.

கிராமப்புற ஊராட்சிகளில் தொழில் முனைவோரை மேம்படுத்தும் விதமாக இணை மானியத் திட்டத்தின்கீழ் தொழில் முனைவோா்க்கு 30 சதவீதம் மானியத்துடன் தொழில் கடன் வழங்கப்படுகிறது. அதன்படி 176 தொழில்முனைவோருக்கு மானியமாக ரூ.1.73 கோடி தொழில் கடன் வழங்கப்பட்டுள்ளது. தொழில் கடனுதவி பெற்ற தொழில்முனைவோருக்கு தொழில் மேம்பாட்டுப் பயிற்சி வழங்கப்படுகிறது.

கிராமப்புறங்களில் சுயதொழில் செய்துவரும் பெண்களுக்கு ரூ.30 ஆயிரம் முதல் ரூ.70 ஆயிரம் வரை தொழில் கடனாக வழங்கப்படுகிறது. அதன்படி 271 பெண்களுக்கு ரூ.1.51 கோடி தொழில் கடனுதவி வழங்கப்பட்டுள்ளது.

மொத்தத்தில் 8006 பயனாளிகளுக்கு ரூ.1 கோடியே 30 லட்சத்து 50 ஆயிரம் முழு மானியமாகவும், 176 தொழில் முனைவோா்களுக்கு 30 சதவிகித மானியத்தில் ரூ.1 கோடியே 73 லட்சம் தொழில் கடனுதவிகளும், 271 பெண்களுக்கு ரூ.1 கோடியே 51 லட்சம் தொழில் கடனுதவிகளும், சமுதாய திறன் பள்ளி மற்றும் சமுதாய பண்ணைப் பள்ளி மூலமாக 7,700 பயனாளிகளுக்கு ரூ.2 கோடியே 29 லட்சத்து 66 ஆயிரத்து 200 செலவில் பயிற்சிகளும் வழங்கப்பட்டுள்ளன என அவா் தெரிவித்துள்ளாா்.