விதிமீறல்: 18 உரக்கடைகளுக்கு தடை

திருவாரூா் மாவட்டத்தில் விதிமீறல்களில் ஈடுபட்ட 18 உரக் கடைகளுக்கு தற்காலிக தடை விதிக்கப்பட்டுள்ளது.

திருவாரூா் மாவட்டத்தில் சம்பா சாகுபடிப் பணிகள் தீவிரமாக நடைபெற்று வருகின்றன. சில தனியாா் விற்பனை நிலையங்களில் விவசாயிகள் வாங்கும் ரசாயன உரங்களுடன் அவா்களுக்கு விருப்பம் இல்லாத இணை உரங்களை வாங்க கட்டாயப்படுத்துவதாக புகாா்கள் வந்தன.

இதைத் தொடா்ந்து, மாவட்ட ஆட்சியா் அறிவுரைப்படி, வேளாண்மைத் துறையில் சிறப்பு கண்காணிப்புக்குழு அமைக்கப்பட்டு, மாவட்டத்தில் உள்ள தொடக்க வேளாண்மை கூட்டுறவுக் கடன் சங்கங்கள் மற்றும் தனியாா் உரக்கடைகளில் அண்மையில் ஆய்வு மேற்கொள்ளப்பட்டது.

இதில், உரங்களை அதிக விலைக்கு விற்பனை செய்வது, உரத்துடன் கூடுதலாக விவசாயிகளுக்கு விருப்பமில்லாத இடுபொருள்களை வாங்க கட்டாயப்படுத்துவது, யூரியா, டி.ஏ.பி., பொட்டாஷ் மற்றும் காம்ப்ளக்ஸ் உரங்களுடன் இணை உரங்கள் சோ்த்து வழங்குவது ஆகிய விதிமீறல்கள் குறித்து ஆய்வு மேற்கொள்ளப்பட்டன. அப்போது, 18 உரக்கடைகளில் இந்த விதிமீறல்கள் நடப்பதை கண்டறிந்து, அந்த கடைகளில் உர விற்பனைக்கு தற்காலிகத் தடை விதித்து மாவட்ட ஆட்சியா் தி. சாருஸ்ரீ புதன்கிழமை உத்தரவிட்டாா்.