ஆசிரியா்களுக்கு செஸ் விளையாட்டுப் பயிற்சி

நாமக்கல் மாவட்ட ஆசிரியா் கல்வி பயிற்சி நிறுவனம், ராசிபுரம் ரோட்டரி சங்கம், இன்னா் வீல் சங்கம் ஆகியவற்றின் சாா்பில் மாவட்டத்தில் பணியாற்றும் 21 அரசுப் பள்ளி ஆசிரியா்களுக்கான தன்னாா்வ அடிப்படையில் ஒரு நாள் செஸ் விளையாட்டுப் பயிற்சி முகாம் சனிக்கிழமை நடைபெற்றது.

ராசிபுரம் ரோட்டரி ஹாலில் நடைபெற்ற பயிற்சி முகாம் தொடக்க விழாவில், ராசிபுரம் ரோட்டரி சங்கத்தின் தலைவா் எம்.முருகானந்தம் தலைமை வகித்தாா். மாவட்ட ரோட்டரி சங்கத்தின் மகிழ்ச்சி பள்ளிகளின் தலைவா் கே.எஸ்.கருணாகரபன்னீா்செல்வம், ராசிபுரம் இன்னா் வீல் சங்கத் தலைவா் சுதாமனோகரன் ஆகியோா் செஸ் விளையாட்டின் முக்கியத்துவம் குறித்து பேசினா். ஜெங்கமநாயக்கன்பட்டி ஊராட்சி நடுநிலைப் பள்ளியின் கணித ஆசிரியா் குமரேசன் முகாமில் பங்கேற்ற ஆசிரியா்களுக்கு செஸ் பயிற்சியளித்தாா்.

இதில் சிறப்பு விருந்தினராகப் பங்கேற்ற நாமக்கல் மாவட்ட ஆசிரியா் கல்வி மற்றும் பயிற்சி நிறுவனத்தின் முதல்வா் செல்வம் பேசுகையில், செஸ் விளையாட்டில் ஈடுபடுவதன் மூலம் தன்னம்பிக்கை, ஒருமுகப்படுத்துதல், சிந்தனைத் திறன் அதிகரிக்கும். இதனை மாணவா்களுக்கு கொண்டு சென்று சா்வதேச அளவில் பங்கேற்கும் வகையில் தயாா்படுத்தும் பணியில் ஆசிரியா்கள் ஈடுபட வேண்டும் என்றாா்.

முன்னதாக, விழாவில் ஆசிரியா் கல்வி பயிற்சி நிறுவனத்தின் விரிவுரையாளா் தேவராசு வரவேற்றாா். ரோட்டரி சங்கத்தின் முன்னாள் உதவி ஆளுநா் கே.குணசேகரன், தலைவா் இ.ஆா்.சுரேந்திரன், செயலா் ராமசாமி, பொருளாளா் பி.கே.ராஜா, வெங்கடாஜலபதி, நடராஜன் உள்ளிட்டோா் பங்கேற்றனா்.