‘ஆபரேஷன் சிந்தூா்’ நடவடிக்கையை உலக நாடுகள் ஏற்றுக் கொண்டன: ஆளுநா் ஆா்.என்.ரவி

‘ஆபரேஷன் சிந்தூா்’ நடவடிக்கையை உலக நாடுகளே ஏற்றுக் கொண்டநிலையில் நமது நாட்டில் சில எதிா்க்கட்சிகள் அதுகுறித்து கேள்விகள்- சந்தேகங்களை எழுப்பி வருகின்றன என ஆளுநா் ஆா். என். ரவி கூறினாா்.

சென்னை தியாகராய நகா் கிருஷ்ண கான சபாவில் சென்னை சிட்டிசன் அமைப்பு சாா்பில் ‘ஆபரேஷன் சிந்தூா்’ வெற்றி, போா்க்களத்தில் ராஜதந்திரமாக செயல்பட்டது குறித்த சிறப்பு கருத்தரங்கம் ஞாயிற்றுக்கிழமை நடைபெற்றது.

இதில் ஆளுநா் ஆா்.என். ரவி சிறப்பு விருந்தினராகப் பங்கேற்றுப் பேசியதாவது: ஒரு நாட்டில் ராணுவம் பலமாக இருந்தால்தான் நாடு பலமாக இருக்கும். இந்திய ராணுவத்தின் பலம் காரணமாக, பாகிஸ்தானுக்கு எதிரான ‘ஆபரேஷன் சிந்தூா்’ ராணுவ நடவடிக்கையை 4 நாள்களில் முடித்து வெற்றி பெற்றுவிட்டோம். எல்லா வித ராணுவ தளவாடங்களும் எவ்வளவு சரியாக சிறப்பாக செயலாற்றுகிறது என்பதையே ஆபரேஷன் சிந்தூா் காட்டியுள்ளது. ஆபரேஷன் சிந்தூா் நடவடிக்கையை உலக நாடுகளே ஏற்றுக் கொண்டுள்ள நிலையில், நமது நாட்டில் சில எதிா்க்கட்சிகள் அது குறித்து கேள்விகள்-சந்தேகங்களை எழுப்பி வருகின்றன. நமது தேசத்துக்கு பாதிப்பு ஏற்படுத்த பாகிஸ்தான் முயற்சித்தால் அதற்கான விலையை அந்த நாடு கொடுக்க வேண்டிவரும்.

பிரதமா் மோடி நமது தேசம் குறித்த சரியான- தெளிவான பாா்வை கொண்ட தலைவராக உள்ளாா். அவரது தலைமையின் கீழ் நாடு வளா்ச்சி பெற்று வருகிறது. இதன் காரணமாக உலக பொருளாதார வளா்ச்சியில் இந்தியா நான்காம் இடத்துக்கு உயா்ந்துள்ளது.

தேசிய கல்விக் கொள்கை நம் தேசத்துக்கு அவசியமானது-கல்வி வளா்ச்சிக்கானது. இதன் மூலம் நாடு மிக வேகமாக முன்னேறும். சிலா் அதனை ஏற்க மறுக்கின்றனா். அது சாத்தியமில்லை. தமிழ்நாட்டில் உள்ள 20 அரசு பல்கலைக்கழகங்களிலிருந்து 7,000 போ் பட்டம் பெறுகின்றனா். ஆனால், அதற்கேற்ற கல்வியறிவும் திறமையும் அவா்களிடம் இல்லை என்பதுதான் உண்மை நிலை என்றாா் ஆளுநா்.

இந்நிகழ்வில் ஓய்வு பெற்ற ஏா் மாா்ஷல் மாதேஸ்வரன், ஓய்வு பெற்ற கா்னல் ஜான் பிரின்ஸ், சென்னை சிட்டிசன் அமைப்பின் தலைவா் கே.டி.ராகவன், செயலா் காயத்ரி சுரேஷ் , பொருளாளா் சுந்தர ராமன் உள்ளிட்டோா் பங்கேற்றனா்.