இனாம்மணியாச்சியில் ரேஷன் அரிசி, அரிசி மாவு பறிமுதல்

கோவில்பட்டி அருகே இனாம் மணியாச்சியில் ரேஷன் அரிசி மற்றும் ரேஷன் அரிசி மாவை பதுக்கி வைத்திருந்த 2 பேரை பிடித்து உணவு பொருள் கடத்தல் தடுப்பு பிரிவு போலீஸாரிடம் ஒப்படைத்தனா்.

கோவில்பட்டி மேற்கு காவல் நிலையத்திற்கு உட்பட்ட இனாம் மணியாச்சி ஊராட்சி அத்தை கொண்டான் பகுதியில் ஒரு வீட்டில் ரேஷன் அரிசி மூட்டைகள் பதுக்கி வைக்கப்பட்டிருப்பதாக கோவில்பட்டி தனிப்பிரிவு உதவி ஆய்வாளா் ஸ்டீபன் மற்றும் தனிப்பிரிவு காவலா்களுக்கு ரகசிய தகவல் கிடைத்ததாம்.

அதையடுத்து, தனிப்பிரிவு காவலா்கள் அத்தை கொண்டான் பகுதியில் ரோந்து பணியில் ஈடுபட்ட போது சந்தேகத்துக்குரிய ஒரு வீட்டை சோதனையிட்ட போது அங்கு தலா 50 கிலோ எடை கொண்ட 13 மூட்டை ரேஷன் அரிசிமாவும், தலா 50 கிலோ எடை கொண்ட 3 மூட்டை ரேஷன் அரிசியும் இருப்பது தெரியவந்தது.

அதையடுத்து அங்கு இருந்த ரேஷன் அரிசி மாவு மற்றும் ரேஷன் அரிசி மூட்டைகள், 2 மோட்டாா் சைக்கிளையும் பறிமுதல் செய்த தனிப்பிரிவினா் அத்தை கொண்டான் பகுதியை சோ்ந்த ராமமூா்த்தி (52) மற்றும் அவருக்கு உதவியாக இருந்த முருகன் (46) ஆகிய இருவரையும் பிடித்து மாவட்ட உணவு பொருள் கடத்தல் தடுப்பு பிரிவினரிடம் ஒப்படைத்தனா்.