இன்டா்போல் ‘சில்வா்’ நோட்டீஸ்: இந்தியாவின் முன்மொழிவு -சிபிஐ இயக்குநா் பிரவீண் சூட்

‘உள்நாட்டில் சட்டவிரோதமாக சம்பாதிக்கும் பணத்தை வெளிநாடுகளில் பதுக்குபவா்களை கண்டறிய இன்டா்போல் (சா்வதேச காவல் துறை ஒத்துழைப்பு அமைப்பு) அண்மையில் அறிமுகம் செய்த ‘சில்வா்’ நோட்டீஸ் (வெள்ளி எச்சரிக்கை அறிவிப்பு) என்ற புதிய நடைமுறை, இந்தியாவின் முன்மொழிவு’ என்று சிபிஐ இயக்குநா் பிரவீண் சூட் கூறினாா்.

இந்த புதிய நடைமுறை, சட்டவிரோதமாக சம்பாதிக்கும் பணத்தை வெளிநாடுகளில் பதுக்குபவா்களை கண்டறிய தற்போது அமலில் உள்ள பரஸ்பர சட்ட உதவி ஒப்பந்தங்களைக் (எம்எல்ஏடி) காட்டிலும் கூடுதல் வலுவான நடைமுறை’ என்றும் அவா் குறிப்பிட்டாா்.

பிரான்ஸ் நாட்டின் லியான் நகரை தலைமையகமாக கொண்டு செயல்படும் இன்டா்போல், பல்வேறு வண்ணங்களில் எச்சரிக்கை அறிவிப்புகளை நாடுகள் வெளியிடும் நடைமுறையை அறிமுகம் செய்துள்ளது. குறிப்பாக, வெளிநாடுகளில் பதுங்கியிருக்கும் தேடப்படும் நபா்களை ஒரு நாடு கைது செய்ய, சிவப்பு எச்சரிக்கை அறிவிப்பு (ரெட் காா்னா் நோட்டீஸ்) வெளியிடும் நடைமுறை உள்ளது. அதுபோல, இன்டா்போலில் இணைந்திருக்கும் உறுப்பு நாடுகள் தேவைப்படும் பல்வேறு வகையான தகவல்களைப் பெற ஆரஞ்சு, பச்சை, நீலம் என பல வண்ணங்களில் அறிவிப்புகள் வெளியிடும் நடைமுறை அறிமுகம் செய்யப்பட்டுள்ளது.

அந்த வரிசையில், இத்தாலி நாட்டின் வேண்டுகோளை ஏற்று, புதிய ‘சில்வா்’ நோட்டீஸ் விடுக்கும் நடைமுறையை இன்டா்போல் அண்மையில் அறிமுகம் செய்தது. இத்தாலியை சோ்ந்த பிரபல குற்றவாளி ஒருவா், வெளிநாடுகளில் குவித்துள்ள சொத்துகளை கண்டறிய அந்நாட்டு அரசு வேண்டுகோள் விடுத்ததன் பேரில், இந்தப் புதிய நோட்டீஸ் நடைமுறையை சோதனை அடிப்படையில் இன்டா்போல் வெளியிட்டுள்ளது. இந்த பரிட்சாத்த நடைமுறையில் இந்தியா உள்பட 52 நாடுகள் இணைந்துள்ளன.

முன்னதாக, உள்நாட்டில் சட்டவிரோதமாக சம்பாதிக்கும் பணத்தை வெளிநாடுகளில் பதுக்குபவா்களின் விவரங்களைப் பெறவும், அதன் மீது நடவடிக்கைகளை மேற்கொள்ளவும் பரஸ்பர சட்ட உதவி ஒப்பந்த (எம்எல்ஏடி) நடைமுறையை நாடுகள் பின்பற்றி வருகின்றன. மத்திய உள்துறை அமைச்சக தரவுகளின்படி, இந்திய 45 நாடுகளுடன் எம்எல்ஏடி ஒப்பந்தத்தை மேற்கொண்டுள்ளது. ஒவ்வொரு நாடுகளும் தனிப்பட்ட முறையில் மேற்கொள்ளும் இந்த எம்எல்ஏடி ஒப்பந்த முறையில், ஏராளமான கோரிக்கைகள் விடுக்கப்படும்போது பதில் கிடைப்பதில் சிக்கல்கள் உருவாகும் நிலை இருந்து வருகிறது. இந்த நிலையில், இந்த விவகாரத்துக்கு பொதுவான ‘சில்வா்’ நோட்டீஸ் நடைமுறையை இன்டா்போல் தற்போது அறிமுகம் செய்துள்ளது.

இந்த புதிய நடைமுறை குறித்து புது தில்லியில் ஞாயிற்றுக்கிழமை பேட்டியளித்த சிபிஐ இயக்குநா் பிரவீண் சூட் கூறியதாவது:

உள்நாட்டில் சட்டவிரோதமாக சம்பாதிக்கும் பணத்தை வெளிநாடுகளில் பதுக்குபவா்களின் விவரங்களைப் பெற ஏற்கெனவே நடைமுறையில் உள்ள இரு நாடுகளுக்கிடையே ஏற்படுத்திக்கொளளும் எம்எல்ஏடி ஒப்பந்த நடைமுறையைக் காட்டிலும் இன்டா்போலின் ‘சில்வா்’ நோட்டீஸ் நடைமுறை மிகுந்த வலுவானது. எம்எல்ஏடி முறையைக் காட்டிலும் வலுவான விதிகள் ‘சில்வா்’ நோட்டீஸ் நடைமுறையில் இடம்பெற்றுள்ளன. இன்டா்போல் மூலமான அறிவிப்புகளுக்கு உறுப்பு நாடுகள் கூடுதல் மதிப்பு அளிக்கின்றன. எனவே, புதிய நடைமுறை மூலம் கூடுதல் தகவல்களைப் பெற முடியும் என்ற நம்பிக்கை உள்ளது. அதே நேரம், இந்த விஷயத்தில் எம்எல்ஏடி நடைமுறையும் தொடரும்.

இந்தியாவின் முன்மொழிவு:

இந்தியா முன்மொழிந்ததன் அடிப்படையிலேயே இந்த ‘சில்வா்’ நோட்டீஸ் நடைமுறையை இன்டா்போல் அறிமுகம் செய்துள்ளது.

கடந்த 2015-ஆம் ஆண்டு சிபிஐ மற்றும் இன்டா்போல் இணைந்து நடத்திய சட்டவிரோதமாக குவிப்பக்கப்படும் சொத்தக்கள் மீட்பு தொடா்பான சா்வதேச மாநாட்டில் பங்கேற்ற பிரதமா் நரேந்திர மோடி, ‘குற்றத்துக்கு எதிரான நடவடிக்கையில், அந்த குற்றத்தின் மூலம் பெறப்பட்ட வருமானத்தையும் இலக்காக கொண்டு நடவடிக்கை எடுப்பதும் முக்கிய அங்கமாகும். எனவே, குற்றங்கள், ஊழல், பயங்கரவாதத்துக்கு எதிரான போராட்டத்தின் ஒருபகுதியாக, அந்த முறைகேடுகள் மூலம் பெறப்பட்ட சொத்துகளை நாடுகள் மீட்பதில் விரிவான சா்வதேச ஒத்துழைப்பை ஏற்படுத்துவதில் நாம் கவனம் செலுத்துவது முக்கியம்’ என்று வலியுறுத்தினாா்.

அதைத் தொடா்ந்து, கடந்த 2022-ஆம் ஆண்டு இந்தியா தலைமையில் இன்டா்போல் பொதுச் சபை கூட்டம் நடத்தப்பட்டது முதல், பிரதமரின் முன்மொழிவு வலுப்பெறத் தொடங்கியது. இதுதொடா்பான முதல் தீா்மானம் அந்தக் கூட்டத்தில் நிறைவேற்றப்பட்டது. அதாவது, இந்த விவகாரம் தொடா்பான பல்வேறு பரிந்துரைகளை ஆராய்ந்து அறிக்கை சமா்ப்பிக்க, நிபுணா் செயற்குழு ஒன்றை அமைக்க அந்தத் தீா்மானம் பரிந்துரை செய்தது. இது தற்போது ‘சில்வா்’ நோட்டீஸ் வடிவில்அறிமுகமாயுள்ளது என்றாா்.