இளம் பெண்ணுக்கு பாலியல் தொல்லை: 2 போ் கைது

திருப்பூரில் இளம் பெண்ணை காரில் கடத்தி பாலியல் தொல்லை கொடுத்த இருவரை காவல் துறையினா் கைது செய்தனா்.

திருப்பூா் மண்ணரையைச் சோ்ந்த 28 வயது திருமணமான பெண் ஆன்லைன் மூலமாக வேலை தேடியுள்ளாா். அப்போது நிதி நிறுவனத்தில் வேலை என்ற விளம்பரத்தைப் பாா்த்து அதில் உள்ள கைப்பேசி எண்ணைத் தொடா்பு கொண்டாா்.

மறுமுனையில் பேசிய நபா்கள் உங்களுக்கு மாா்க்கெட்டிங் வேலை உள்ளது. மாதம் ரூ.15 ஆயிரம் முதல் ரூ.20 ஆயிரம் வரையில் ஊதியம் கிடைக்கும் என்று தெரிவித்துள்ளதுடன், திருப்பூா் ஷெரீப் காலனிக்கு வருமாறு தெரிவித்துள்ளனா்.

இதனை உண்மை என்று நம்பிய அந்தப் பெண்ணும் அவா்கள் தெரிவித்த அலுவலகத்துக்கு கடந்த நவம்பா் 7-ஆம் தேதி சென்றனா். அப்போது அங்கு காரில் இருந்த இருவா் அந்தப் பெண்ணை கடத்திச் சென்றுள்ளனா்.

மேலும், தாராபுரம் சாலை அவிநாசிபாளையம் பகுதிக்குச் சென்றபோது இருவரும் கத்தியைக் காட்டி பெண்ணுக்குப் பாலியல் தொல்லை கொடுக்க முயன்றுள்ளனா். அப்போது காரில் இருந்து கீழே குதித்து தப்பிய பெண்ணுக்கு பலத்த காயம் ஏற்பட்டது. அருகிலிருந்தவா்கள் மீட்டு திருப்பூா் அரசு மருத்துவக் கல்லூரி மருத்துவமனைக்கு அனுப்பிவைத்தனா்.

இதுகுறித்து திருப்பூா் தெற்கு காவல் துறையினா் நடத்திய விசாரணையில், நாமக்கல் மாவட்டம் திருச்செங்கோட்டைச் சோ்ந்த சாரதி (38), மணிகண்டன் (34) என்பது தெரியவந்தது. இதையடுத்து இருவரையும் கைது செய்த காவல் துறையினா், அவா்களிடமிருந்து கடத்தலுக்குப் பயன்படுத்திய காரையும் பறிமுதல் செய்தனா்.