`உதயநிதியைக் கூப்பிடுவேன்..!' - மெரினாவில் வாக்குவாதம் செய்த நபர்... போலீஸ் விசாரணை!

சென்னையில் நள்ளிரவு நேரத்தில் போலீஸார் ரோந்து பணி, வாகனச் சோதனையில் ஈடுபடுவது உண்டு. சம்பவத்தன்று போலீஸார், மெரினா சர்வீஸ் சாலையில் ரோந்துப் பணியில் ஈடுபட்டுக் கொண்டிருந்தனர். அப்போது அந்தச் சாலையில் சொகுசு கார் ஒன்று நீண்ட நேரமாக நின்றுக் கொண்டிருந்தது. உடனடியாக போலீஸார் அங்குச் சென்று விசாரித்தனர். அப்போது காருக்குள் ஒரு ஆணும் பெண்ணும் இருந்தனர். அவர்களிடம் நள்ளிரவு நேரத்தில் இங்கு நிற்க வேண்டாம். வீட்டுக்குச் செல்லுங்கள் என போலீஸார் கூறினர். அதற்கு அந்த ஆண், போலீஸாரை தரக்குறைவாக பேசினார். அவரின் அருகிலிருந்த பெண், ஆணுக்கு சப்போர்ட்டாக பேசத் தொடங்கினார். இதையடுத்து போலீஸார், அவர்களை தங்களின் செல்போனில் வீடியோ எடுத்தனர்.

இதையடுத்து அந்த ஆணும் பெண்ணும் போலீஸார் எடுத்த வீடியோவுக்கு போஸ் கொடுத்தனர். நீங்கள் யார் என்று கேட்டதும், இருவரும் வீடியோவுக்கு போஸ் கொடுத்து கிண்டல் செய்தனர். மேலும், நான் உதயநிதி ஸ்டாலினை இங்கேயே கூப்பிடுவேன் பார்க்கிறேயா? என போலீஸாரை மிரட்டும் தொனியில் அந்த ஆண் பேசினார். மேலும் வையாபுரி மூஞ்சு, பல்லி மூஞ்சு என போலீஸாரை கிண்டல் செய்தார். சிறிது நேரம் கழித்து அந்த ஆண், பெண்ணை காரில் ஏற்றிக் கொண்டு அங்கிருந்து புறப்பட்டார். இந்த தகவலை ரோந்து பணியில் ஈடுபட்ட போலீஸார் தங்களின் உயரதிகாரிகளின் கவனத்துக்கு கொண்டு சென்றனர். இந்தச் சூழலில்தான் வீடியோ சமூக வலைதளங்களில் வெளியாகி வைரலாகிக் கொண்டிருக்கிறது.

இதுகுறித்து போலீஸ் உயரதிகாரி ஒருவரிடம் கேட்டதற்கு, ``பொதுமக்களின் பாதுகாப்பு கருதி, மெரினாவில் நள்ளிரவு நேரத்தில் காரிலிருந்த அவர்களை வீட்டுக்குச் செல்லும்படி கூறினோம். ஆனால் அவர்களோ போலீஸாரை தரக்குறைவாக பேசியுள்ளனர். இதுகுறித்து காவலர் சிலம்பரசன் என்பவர், மயிலாப்பூர் காவல் நிலையத்தில் புகாரளித்திருக்கிறார். அதனால் காரின் பதிவு நம்பரைக் கொண்டு விசாரித்து வருகிறோம். எங்களின் முதற்கட்ட விசாரணையில் காரில் வந்தது மோகன் என்ற தகவல் மட்டும் கிடைத்திருக்கிறது. மேலும் அவர் கார் பிசினஸில் ஈடுபட்டு வருகிறார். சட்டப்படி அவருக்கு சம்மன் கொடுத்து விசாரணை நடத்திய பிறகு அடுத்தக்கட்ட நடவடிக்கை எடுக்கப்படும்" என்றார்.