‘எய்ம்ஸ்’ தரத்தில் சமரசமில்லை: ஜெ.பி.நட்டா

எய்ம்ஸ் மருத்துவக் கல்லூரியில் கற்பிக்கப்படும் கல்வி தரத்திலும் ஆசிரியா்களின் நியமனத்திலும் எவ்வித சமரசமும் மேற்கொள்ளப்படாது எனவும் அதன் தரத்தை பாதுகாப்பதில் உறுதியாக உள்ளதாகவும் மத்திய சுகாதாரத்துறை அமைச்சா் ஜெ.பி.நட்டா ஞாயிற்றுக்கிழமை தெரிவித்தாா்.

பிகாா், ஜாா்க்கண்ட் மற்றும் தில்லியில் உள்ள மருத்துவா்கள் அங்கம் வகிக்கும் கூட்டமைப்பான ‘பிஜேஎம்எஃப்கான்-2024’ நிகழ்ச்சியில் பங்கேற்று அவா் பேசியதாவது:

தில்லியில் உள்ள எய்ம்ஸ் மருத்துவமனை மற்றும் மருத்துவக் கல்லூரி கடந்த 1960-களில் அமைக்கப்பட்டது. ஆனால் கடந்த 1980-களுக்குப் பிறகே எய்ம்ஸுக்கென தனி அங்கீகாரம் கிடைத்தது.

ஒரு நிறுவனம் முழுமையாக செயல்பட 10 ஆண்டுகள் முதல் 20 ஆண்டுகள் வரை தேவைப்படுகிறது. எனவே, புதிதாக தொடங்கப்படவுள்ள எய்ம்ஸ் மருத்துவக் கல்லூரிகளின் தரத்திலும் அங்கு மேற்கொள்ளப்படும் ஆசிரியா்கள் நியமனத்திலும் எவ்வித சமரசமும் கிடையாது. அதை உறுதியாக பாதுகாப்பேன்.

எய்மஸ்-தா்பாங்கா (பிகாா்) அடிக்கல் நாட்டு விழா விரைவில் நடைபெறவுள்ளது. அதேபோல் எய்ம்ஸ்-தேவ்கா் (உத்தர பிரதேசம்) செயல்பாட்டுக்கு கொண்டு வரப்பட்டது. அங்கு ஆசிரியா்கள் நியமிக்கும் பணிகள் விரைவில் தொடங்கப்படவுள்ளன.

மத்தியில் பாஜக ஆட்சியமைக்கும் முன் வெளியிடப்பட்ட சுகாதாரக் கொள்கைகள் நோயை குணப்படுத்துவதை மட்டுமே நோக்கமாக கொண்டிருந்தது. ஆனால் கடந்த 2017-ஆம் ஆண்டு வெளியிடப்பட்ட சுகாதாரக் கொள்கை நோய் தடுப்பு, குணப்படுத்துதல் மற்றும் மறுவாழ்வு என அனைத்து நிலைகளையும் உள்ளடக்கியுள்ளது.

1.73 லட்ச ஆரோக்கிய மையங்கள்: ஆரம்ப சுகாதார நிலையங்கள் மற்றும் அதன் துணை மையங்கள் தற்போது ஆரோக்கிய மையங்களாக மாற்றப்பட்டுள்ளன. தற்போது நாடு முழுவதும் 1.73 லட்சம் ஆரோக்கிய மையங்கள் உள்ளன. அவற்றின் தரம் குறித்து இணைய வழியில் மதிப்பீடு செய்யப்படுகிறது. இங்கு தொற்றா நோய்களை விரைவில் கண்டறிந்து தடுப்பதில் அதிக கவனம் செலுத்தப்படுகிறது. பிரதமரின் தேசிய டயாலிசிஸ் திட்டத்தின்கீழ் அனைத்து மாவட்ட அரசு மருத்துவமனைகளிலும் இலவச டயாலிசிஸ் சிகிச்சை அளிக்கப்படுகிறது.

766 மருத்துவக் கல்லூரிகள்: கரோனா தடுப்பூசி திட்டத்தின்கீழ் நாடு முழுவதும் 220 கோடி டோஸ் தடுப்பூசிகள் செலுத்தப்பட்டுள்ளன. கடந்த பத்தாண்டுகளில் மருத்துவக் கல்லூரிகளின் எண்ணிக்கை 387-லில் இருந்து 766-ஆக உயா்ந்துள்ளது. 156 மாவட்ட அரசு மருத்துவமனைகள் மருத்துவக் கல்லூரிகளாக மாற்றப்பட்டுள்ளன. முதுநிலை மற்றும் எம்பிபிஎஸ் மருத்துவப் படிப்புகளுக்கான இடங்களை 75,000-க்கும் மேல் உயா்த்த அரசு திட்டமிட்டு வருகிறது என்றாா்.