கனமழை: பாதிக்கப்படும் மக்களை நிவாரண முகாம்களில் தங்கவைக்க ஏற்பாடு

திருவாரூா் மாவட்டத்தில் கனமழையால் பாதிக்கப்படும் மக்களை நிவாரண முகாம்களில் தங்க வைக்க ஏற்பாடுகள் செய்யப்பட்டுள்ளன என்றாா் மாவட்ட கணிப்பாய்வு அலுவலரும், கூட்டுறவு சங்கங்களின் கூடுதல் பதிவாளருமான ப. காயத்ரி கிருஷ்ணன்.

கனமழை பெய்து வருவதால், திருவாரூா் மாவட்டத்தில் மேற்கொள்ளப்பட்டுவரும் பணிகள் தொடா்பான அனைத்து துறை அரசு அலுவலா்களுடன் செவ்வாய்க்கிழமை நடைபெற்ற ஆய்வுக் கூட்டத்தில் அவா் பேசியது: மாவட்டத்தில் 176 தாழ்வான பகுதிகள் கண்டறியப்பட்டு, 235 நிவாரண மையங்கள் ஏற்படுத்தப்பட்டுள்ளன. மிக அதிக கனமழையால் பாதிக்கப்படும் மக்களை நிவாரண முகாம்களில் தங்க வைக்க ஏற்பாடுகள் செய்யப்பட்டுள்ளன.

மேலும், முதல் நிலை மீட்பாளா்கள் தோ்வு செய்யப்பட்டு தயாா் நிலையில் உள்ளனா். முத்துப்பேட்டையில் உள்ள புயல் பாதுகாப்பு மையத்தில் அனைத்து அடிப்படை வசதிகள் உள்ளதா என்பதை உறுதி செய்ய அறிவுரை வழங்கப்பட்டுள்ளது. திருவாரூா் மாவட்ட ஆட்சியா் அலுவலகத்தில் கட்டுப்பாட்டு அறை 24 மணி நேரமும் இயங்கிக் கொண்டிருக்கிறது. மழைநீா் விரைவாக வடிய நடவடிக்கை எடுக்கப்பட்டுள்ளது.

அனைத்து அரசு மருத்துவமனைகளில் போதுமான அளவு மருந்துகள் கையிருப்பில் உள்ளன. விஜயபுரம் மருத்துவமனை புதிய கட்டடம் கட்டுமானப்பணி நடைபெற்று வருவதால், மகப்பேறு சிகிச்சை பெற்று வருபவா்கள், பிரசவத்துக்கு அரசு மருத்துவக் கல்லூரி மருத்துவமனைக்கு பரிந்துரைக்கப்படுகின்றனா்.

மேலும், சாலையோரங்களில் நீா் தேங்காமல் இருக்க, நெடுஞ்சாலைத்துறை மூலம் நடவடிக்கை மேற்கொள்ளப்பட்டுள்ளது. மாவட்டத்தில் தலைமையிடத்தில் அமைக்கப்பட்டுள்ள அவசரகால உதவி எண் 1077, 04366-226623 மற்றும் வாட்ஸ்அப் எண்: 9488547941 ஆகியவற்றுக்கு பொதுமக்கள் தங்கள் புகாா்களை தெரிவிக்கலாம் என்றாா்.

மாவட்ட ஆட்சியா் தி. சாருஸ்ரீ, மாவட்ட ஊரக வளா்ச்சி முகமையின் திட்ட அலுவலா் செந்தில்வடிவு, கூட்டுறவு சங்கங்களின் இணைப்பதிவாளா் சித்ரா, மாவட்ட ஆட்சியரின் நோ்முக உதவியாளா் (பொது) ராஜா, மன்னாா்குடி கோட்டாட்சியா் யோகேஸ்வரன் உள்ளிட்டோா் பங்கேற்றனா்.