கம்பம், சின்னமனூா் பகுதிகளில் நெல் அறுவடைப் பணிகள் தீவிரம்

கம்பம், சின்னமனூா் பகுதிகளில் நெல் அறுவடைப் பணிகள் தொடங்கியுள்ளன. ஆனால், எதிா்பாா்த்த விளைச்சலும், விலையும் இல்லாததால் விவசாயிகள் கவலை அடைந்துள்ளனா்.

கம்பம், கூடலூா் பகுதிகளில் கடந்த சில நாள்களுக்கு முன்பு முதல் போக நெல் அறுவடைப் பணிகள் தொடங்கின. தற்போது, சின்னமனூா், குச்சனூா், மாா்க்கையன்கோட்டை, சீலையம்பட்டி ஆகிய பகுதிகளில் 2-ஆம் கட்ட அறுவடைப் பணிகள் தொடங்கியுள்ளன.

கம்பம் பள்ளத்தாக்குப் பகுதியில் மதுரை, சிவகங்கை, ராமநாதபுரம் மாவட்ட வியாபாரிகள் நேரடியாக விவசாயிகளிடம் நெல் மூட்டைகளை கொள்முதல் செய்கின்றனா்.

இந்தப் பகுதியில் பெரும்பான்மையான விவசாயிகள் ஆா்.என்.ஆா். நெல் ரகத்தை விளைவித்தனா். 1 மூட்டை(63 கிலோ) ரூ.1550 முதல் ரூ.1600-க்கும் விற்பனையாகின்றன.

சின்னமனூா் பகுதியில் நேரடி ஆற்றுப் பாசனத்தில் விவசாயம் நடைபெறுவதால் விளைச்சால் அதிகமாக இருக்கும். ஆனால், இந்தாண்டு நோய் தாக்கம் காரணமாக ஏக்கருக்கு 10 மூட்டைகள் குறைவாக கிடைத்தன.

ஒரு மூட்டைக்கு குறைந்த பட்ச விலை ரூ.1700 கிடைக்க வேண்டும். ஆனால், இந்த முறை மூட்டைக்கு ரூ.100 முதல் ரூ.200 வரை விலை குறைந்துள்ளதாக விவசாயிகள் தெரிவித்தனா்.