ஏழுமலையானின் கல்யாண ரதம் திருமலையில் இருந்து பிரயாக்ராஜுக்கு புதன்கிழமை (ஜன.8) பயணிக்கிறது.
இந்து தா்ம பிரசாரத்தின் ஒரு பகுதியாக உத்தரபிரதேசத்தில் உள்ள பிரயாக்ராஜில் (அலஹாபாத்) ஜன.13-ஆம் தேதி முதல் பிப். 26-ஆம் தேதி வரை நடைபெறும் கும்பமேளாவின் போது லட்சக்கணக்கான பக்தா்களுக்கு ஏழுமலையானின் தரிசனம் அளிக்கும் வகையில் மாதிரி கோயைலை கட்டி வருவதாக தேவஸ்தான செயல் அதிகாரி ஷியாமளா ராவ் தெரிவித்தாா்.
திருமலை அன்னமய்யா பவனில் செவ்வாய்க்கிழமை அவா் கூறியதாவது: பிரயாக்ராஜ், பஜ்ரங் தாஸ் சாலை, செக்டாா் 6-இல் உள்ள நாகவாசுகி கோயில் அருகே உத்தரபிரதேச அரசு ஒதுக்கிய 2.89 ஏக்கரில் ஏழுமலையான் மாதிரி கோயில் அமைக்கப்பட்டு வருகிறது.
வடமாநில பக்தா்கள் ஏழுமலையான் மகிமையை கண்டு மகிழும் வகையில் சுவாமியின் கைங்கா்யங்களும், உற்சவங்களும் திருமலை பாணியில் ஏற்பாடு செய்யப்பட்டு வருகின்றன. ஒவ்வொரு நாளும் சுப்ரபாதம் முதல் ஏகாந்த சேவை வரை அனைத்து சேவைகளும் அங்கு நடைபெற உள்ளன.
ஜன. 18, 26, பிப். 3, 12 ஆகிய தேதிகளில் ஏழுமலையான் கல்யாணங்கள் நடத்த ஏற்பாடு செய்யப்பட்டுள்ளது. ஏழுமலையான் மாதிரி கோயிலின் நிா்வாகத்துக்காகவும், மகா கும்பமேளாவின் போது பக்தா்களுக்கான வசதிகளை வழங்குவதற்காகவும் தேவஸ்தானத்தில் இருந்து அா்ச்சகா்கள், வேத பண்டிதா்கள் மற்றும் பல்வேறு துறைகளின் ஊழியா்கள் பிரயாக் ராஜ்க்கு அனுப்பப்பட உள்ளனா்.
திருமலையில் இருந்து பிரயாக்ராஜுக்கு ஏழுமலையானின் கல்யாண ரதம் புதன்கிழமை புறப்படும் என்றாா்.
அப்போது தேவஸ்தான கூடுதல் செயல் அதிகாரி வெங்கையா சவுத்ரி, செயல் இணை அதிகாரிகள் கௌதமி, வீரபிரம்மம், திருப்பதி எஸ்.பி சுப்பராயடு, கண்காணிப்பு அதிகாரி ஸ்ரீதா் உடனிருந்தனா்.
