கொள்ளிடம் பகுதியில் குவிந்து கிடக்கும் குப்பைகளால் அப்பகுதி மக்கள் அவதிக்குள்ளாகின்றனா்.
கொள்ளிடம் ஒன்றியத்தில் ஆணைக்காரன்சத்திரம், கோபாலசமுத்திரம் ஊராட்சிகளில் வீடுகள், வணிக நிறுவனங்களில் இருந்து சேகரிக்கப்படும் குப்பைகள், கொட்டுவதற்கு இடம் இல்லாமல், ஆங்காங்கே சாலையோரம், குடியிருப்பு பகுதிகளில், பள்ளிகள் அருகில் கொட்டப்படுகின்றன.
கொள்ளிடம் கடைவீதி அருகே மற்றும் அக்ரஹாரத் தெரு, ஊராட்சி தொடக்கப் பள்ளி மற்றும் அரசு மேல்நிலைப் பள்ளி அருகே குப்பைகள் குவியல் குவியலாக கொட்டப்பட்டு வருகின்றன.
ஊராட்சி தூய்மைப் பணியாளா்கள் சேகரிக்கும் குப்பைகளை கொட்டுவதற்கு இடம் இல்லாத நிலையில், ஆங்காங்கே தேங்கியுள்ளன.
ஆகையால், கோபாலசமுத்திரம், ஆணைக்காரன் சத்திரம் ஊராட்சிகளில் சேகரமாகும் குப்பைகளை கொட்டுவதற்கான இடம் தோ்வு செய்யவேண்டும் எனக் கோரிக்கை விடுக்கப்பட்டுள்ளது.
