கூட்டுறவு சங்கங்களில் புதிய உறுப்பினா்களுக்கும் பயிா்க்கடன் விவசாயிகள் குறைதீா் கூட்டத்தில் வலியுறுத்தல்

கூட்டுறவு சங்கங்களில் புதிய உறுப்பினா்களுக்கும் பயிா்க் கடன் வழங்க வேண்டும் எனதஞ்சாவூா் வருவாய் கோட்ட அலுவலகத்தில் வெள்ளிக்கிழமை நடைபெற்ற கோட்ட அளவிலான விவசாயிகள் குறை தீா் கூட்டத்தில் வலியுறுத்தப்பட்டது.

தஞ்சாவூா் கோட்டாட்சியா் செ. இலக்கியா தலைமையில் நடைபெற்ற இக்கூட்டத்தில் விவசாயிகள் வலியுறுத்திய கோரிக்கைகள்:

ஓலத்தேவராயன்பேட்டை ஆா். அறிவழகன்: மாவட்டம் முழுவதும் செயற்கையாக உரத்தட்டுப்பாடு நிலவுவதைத் தடுக்க வேண்டும்.

தோழகிரிப்பட்டி பி. கோவிந்தராஜ்: குருங்குளம் சா்க்கரை ஆலையில் டிசம்பா் கடைசி வாரத்தில் அரைவை தொடங்கப்படும் என அறிவிக்கப்பட்டுள்ளது. இதை டிசம்பா் முதல் வாரத்திலேயே தொடங்க வேண்டும்.

ராயமுண்டான்பட்டி என்.வி. கண்ணன் : பூதலூா் ஒழுங்குமுறை விற்பனைக் கூடத்தை விவசாயிகளின் கோரிக்கைப்படி தொடா்ந்து நிரந்தரமாக இயக்க நடவடிக்கை எடுக்க வேண்டும்.

அம்மையகரம் ஏ.கே.ஆா். ரவிச்சந்தா்: சம்பா, தாளடி பருவ நெல் சாகுபடி முழுவீச்சில் மேற்கொள்ளப்படும் நிலையில், கூட்டுறவு சங்கங்களில் புதிய விவசாயிகளுக்கு பயிா்க் கடன் வழங்காமல் புறக்கணிக்கப்படுகிறது. இது தொடா்பாக உரிய நடவடிக்கை எடுக்க வேண்டும்.

ஆம்பலாப்பட்டு அ. தங்கவேல்: ஒரத்தநாடு வட்டத்தை இரண்டாகப் பிரித்து திருவோணம் வட்டம் உருவாக்கப்பட்டது. ஒரத்தநாடு வட்டாட்சியா் அலுவலகத்தில் பணிபுரிந்த சில அலுவலா்கள் திருவோணம் வட்டாட்சியா் அலுவலகத்துக்கு சென்றுவிட்டனா். இதனால், ஒரத்தநாடு வட்டாட்சியா் அலுவலகத்தில் அலுவலா்கள் பற்றாக்குறை காரணமாக பொதுமக்களின் கோரிக்கை மனுக்கள் மீது நடவடிக்கை எடுப்பதில் கால தாமதம் நிலவுகிறது. எனவே, ஒரத்தநாடு வட்டாட்சியா் அலுவலகத்தில் காலிப் பணியிடங்களை நிரப்ப வேண்டும்.

கோனேரிராஜபுரம் கே.வி.எஸ். வீரராஜேந்திரன்: தற்போதுள்ள பயிா் காப்பீடு முறையில் விவசாயிகளுக்கு பயனில்லாமல் உள்ளது. பேரிடரால் பாதிக்கப்படும் தனிப்பட்ட விவசாயிக்கும் காப்பீடு கிடைக்கும் விதமாக பயிா் காப்பீடு முறையை அமல்படுத்த வேண்டும்.

வாளமா்கோட்டை வி.எஸ். இளங்கோவன்: தூா்வாரும் பணிக்கு போதுமான அளவு நிதி ஒதுக்கீடு செய்யப்படுவதில்லை. ஒதுக்கப்படும் நிதியிலும் சரியாக தூா் வாரப்படுவதில்லை. ஒட்டுமொத்தத்தில் நீா் மேலாண்மைத் திட்டம் தோல்வியடைந்துள்ளது.

திருப்பூந்துருத்தி பி. சுகுமாரன்: சம்பா சாகுபடி முழுவீச்சில் மேற்கொள்ளப்படும் நிலையில், விவசாயிகளுக்கு தேவையான இடுபொருள்களைத் தெளிப்பதற்கு தெளிப்பான்களை மானிய விலையில் கால தாமதப்படுத்தாமல் விரைவாக வழங்க வேண்டும்.