சுகாதார நிலையத்துக்குள் புகும் பாம்புகள்: நோயாளிகள் அச்சம்!

திருவாடானை அருகே ஆண்டாவூரணி துணை சுகாதார நிலையத்துக்குள் பாம்புகள் வருவதால் நோயாளிகள் மத்தியில் அச்சம் நிலவுகிறது.

ஆண்டாவூரணி துணை சுகாதார நிலையத்துக்கு தினமும் நூற்றுக்கணக்கான வெளி நோயாளிகள் வந்து சிகிச்சை பெற்றுச் செல்கின்றனா். இந்த துணை சுகாதார நிலையம் பாரமரிப்பு இன்றி சேதம் அடைந்துள்ளது. சுற்றுச் சுவா் கட்ட வேண்டும் என பொதுமக்கள் பலமுறை கோரிக்கை வைத்தும் பலன் இல்லை.

கண்மாய்க் கரை, விவசாய நிலங்கள் உள்ள பகுதியில், சுகாதார நிலையம் உள்ளதால் பாம்புகள், விஷப்பூச்சிகள் அடிக்கடி புகுந்து விடுகின்றன. இதனால், சிகிச்சைக்கு வரும் நோயாளிகள் அச்சமடைந்துள்ளனா் .

இதுகுறித்து கிராம பொதுமக்கள் கூறியதாவது:

இந்த மருத்துவமனை போதுமான பாரமரிப்பு இன்றி சேதம் அடைந்துள்ளது. மேலும், சுற்றிலும் சுற்றுச்சுவா் கட்டினால் பாதுகாப்பாக இருக்கும். அரசு உடனடியாக சிறப்பு நிதி ஒதுக்கிடு செய்து அரசு துணை சுகாதார நிலையத்தை சீரமைத்து, சுற்றுச்சுவா் கட்ட நடவடிக்கை எடுக்க வேண்டும் என்றனா்.