ஜேக் பிரேசர் மெக்கர்க் விலகல்..! வங்கதேச வீரர் சேர்ப்பு!

தில்லி கேபிடல்ஸ் அணி வீரர் ஜேக் பிரேசர் மெக்கருக்குப் பதிலாக முஸ்தபிசூர் ரஹ்மான் தேர்வு செய்யப்பட்டுள்ளார்.

ஐபிஎல் போட்டிகள் ஒத்திவைக்கப்பட்ட நிலையில் ஆஸி. வீரர்கள் கலந்துகொள்வதில் சிக்கல் ஏற்பட்டுள்ளதால் இந்த முடிவு எடுக்கப்பட்டுள்ளதாக அறிவிக்கப்பட்டுள்ளது.

29 வயதாகும் வங்கதேச இடதுகை வேகப் பந்துவீச்சாளர் முஸ்தபிசூர் ரஹ்மான் டி20 போட்டிகளில் 351 விக்கெட்டுகள் எடுத்துள்ளார்.

பாகிஸ்தானுடனான மோதலினால் ஐபிஎல் போட்டிகள் பாதியிலேயே நிறுத்தப்பட்டு ஒத்திவைக்கப்பட்டன.

தற்போது, ஐபிஎல் போட்டிகள் மீண்டும் மே.17ஆம் தேதி முதல் தொடங்குகின்றன.

ஆஸ்திரேலியாவைச் சேர்ந்த ஜேக் பிரேசர் மெக்கர்க் தில்லி அணிக்காக இந்த சீசனில் 5 போட்டிகளில் 55 ரன்களை மட்டுமே எடுத்தார்.

மிட்செல் ஸ்டார்க் தில்லி கேபிடல்ஸ் அணிக்கு முக்கியமான பங்கு வகிக்கிறார்.

உலக டெஸ்ட் சாம்பியன்ஷிப்பை முன்னிட்டு ஸ்டார்க் பங்கேற்பதில் சிக்கல் இருப்பதால் அவரில்லாத இடத்தை நிரப்ப முஸ்தபிசூர் ரஹ்மான் பயன்படுவாரென தில்லி கேபிடல்ஸ் அணி முடிவெடுத்துள்ளது.

முஸ்தபிசூர் ரஹ்மான் சிஎஸ்கே அணியிலும் நன்றாக விளையாடி ரசிகர்களிடம் கவனத்தை ஈர்த்தார்.

2016-ஆம் ஆண்டு ஐபிஎல் தொடரில் அறிமுகமான முஸ்தபிசூர் ரஹ்மான் கடந்த சீசன்களில் தில்லி அணிக்காக 2022, 2023இல் விளையாடியுள்ளார்.

ஐபிஎல் தொடரில் 38 போட்டிகளில் 38 விக்கெட்டுகளை எடுத்துள்ளார். பந்துவீச்சில் எகானமி 7.84ஆக இருப்பது குறிப்பிடத்தக்கது.

புள்ளிப் பட்டியலில் தில்லி அணி 5-ஆவது இடத்தில் இருக்கிறது. பிளே ஆஃப்-க்கு செல்ல அடுத்தடுத்த போட்டிகளில் வெற்றியடைய வேண்டிய கட்டாயத்தில் தில்லி அணி இருக்கிறது.