நீா்வழிப் பாதை ஆக்கிரமிப்பை அகற்ற கோரிக்கை

நிலக்கோட்டை அருகே நீா்வழிப் பாதை ஆக்கிரமிப்பை அகற்ற வலியுறுத்தி பப்பாளிப் பழங்களை ஆட்சியா் அலுவலகத்தில் கொட்டி விவசாயி ஒருவா் நூதான முறையில் திங்கள்கிழமை மனு அளித்தாா் .

திண்டுக்கல் மாவட்டம், நிலக்கோட்டையை அடுத்த ஒருதட்டு கிராமத்தைச் சோ்ந்தவா் சி.ராஜாங்கம் (45). ஆட்சியா் அலுவலகத்துக்கு வந்த இவா், தனது தோட்டத்தில் விளைந்த பப்பாளிப் பழங்களை கீழே கொட்டி மனு அளித்தாா். அப்போது அவா் கூறியதாவது:

ஒருதட்டு சடையாண்டிபுரம் பகுதியில் எனக்கு 8 ஏக்கரில் தோட்டம் உள்ளது. இந்தத் தோட்டத்தில் ரோஜா, செவ்வந்தி, மா, பப்பாளி, சப்போட்டா உள்ளிட்டவற்றை சாகுபடி செய்துள்ளேன். தோட்டத்துக்கு முறையான பாதை வசதி இல்லாததால், நீா்வழிப் பாதையை பயன்படுத்தி இடுப் பொருள்களையும், மகசூலையும் எடுத்துச் சென்று வந்தோம்.

இந்த நிலையில், இதே பகுதியைச் சோ்ந்த சிலா் நீா் வழிப் பாதையை ஆக்கிரமித்து, பட்டா நிலம் என கூறி வழியை மறித்துவிட்டனா். இதுகுறித்து மாவட்ட நிா்வாகத்திடம் கடந்த ஓராண்டாக புகாா் அளித்து வருகிறேன்.

அதிகாரிகள் வரும்போது ஆக்கிரமிப்பை அகற்றிக் கொள்ளும் அந்த நபா்கள், பின்னா் மீண்டும் வழியை மறிக்கின்றனா். இதனால் தோட்டத்துக்குச் செல்ல முடியாத நிலை உள்ளது. எனவே, மாவட்ட நிா்வாகம் இதில் தலையிட்டு நிரந்தர தீா்வு ஏற்படுத்தித் தர வேண்டும் என்றாா்.