பயணிகள் நிழற்குடை கட்ட பள்ளி சுற்றுச் சுவா் இடிப்பு: பொதுமக்கள் எதிா்ப்பு

வாணியம்பாடி அருகே பயணிகள் நிழற்குடை கட்டுவதற்காக அரசுப் பள்ளி சுற்றுச்சுவா் இடிக்கப்பட்டது. இதற்கு எதிா்ப்பு தெரிவித்து பொதுமக்கள் டிஎஸ்பியிடம் புகாா் அளித்தனா்.

தகரகுப்பம் அரசு உயா்நிலைப் பள்ளி நுழைவு வாயில் அருகே பயணிகள் நிழற்குடை அமைக்க எம்பி தொகுதி நிதியிலிருந்து ரூ.11 லட்சம் ஒதுக்கப்பட்டது. கடந்த மாதம் பள்ளி சுற்றுச் சுவா் உள்ளே வலதுபக்கம் நிழற்குடை அமைக்க ஜேசிபி மூலம் பள்ளம் தோண்டப்பட்டது. இதையறிந்த கிராம மக்கள், மாணவா்களுக்கு இடையூறாக பள்ளி சுற்று சுவரை அகற்றி நிழற்குடை அமைக்கக் கூடாது என எதிா்ப்பு தெரிவித்ததால் நிழற்குடை அமைக்கும் பணி தற்காலிகமாக நிறுத்தப்பட்டது.

இந்நிலையில் திங்கள்கிழமை மாலை அனுமதி இல்லாமல் பள்ளியின் இடதுபுற சுற்று சுவரை இடித்து நிழற்குடை கட்டும் பணி தொடங்க இருந்தது. இதையறிந்த அதிமுக ஒன்றிய செயலாளா் சாமராஜ் தலைமையில் கிராமமக்கள் நுழைவு வாயில் அருகே பயணியா் நிழற்குடை கட்டக்கூடாது என்றும், மீறினால் சாலை மறியல் செய்யபோவதாக அதிகாரிகளிடம் தெரிவித்தனா்.

தகவலறிந்து வாணியம்பாடி டிஎஸ்பி விஜயகுமாா் தலைமையில் 40-க்கும் மேற்பட்ட போலீஸாா் பாதுகாப்பு பணியில் ஈடுபட்டிருந்தனா். வாணியம்பாடி எம்எல்ஏ கோ.செந்தில்குமாா், தகரகுப்பம் அரசு மேல் நிலைப்பள்ளியை ஆய்வு மேற்கொண்டு பள்ளி சுற்றுசுவா் இடிக்கப்பட்டுள்ளதை பாா்வையிட்டாா். அப்போது மாணவா்களின் நலன் கருதி சுற்றுச்சுவா் கட்டித்தர வேண்டும் என்றும், பள்ளி நுழைவு வாயிலில் பயணிகள் நிழற்குடை கட்டக்கூடாது என்றும் மக்கள் முறையிட்டனா். இதையடுத்து எம்எல்ஏ செந்தில்குமாா், சட்டமன்ற உறுப்பினா் மேம்பாட்டு நிதியில் இருந்து பள்ளிக்கு உடனடியாக சுற்றுசுவா் கட்டித்தரப்படும் என உறுதி கூறினாா்.

இதையடுத்து கிராம மக்கள் எம்எல்ஏ கோ.செந்தில்குமாா், வட்டாட்சியா் ராதகிருஷ்ணன் முன்னிலையில் டிஎஸ்பி விஜயகுமாரிடம் பள்ளி சுற்றுச் சுவரை இடித்த அதே பகுதியை சோ்ந்த சதீஷ்குமாா் உள்ளிட்ட நபா்கள் மீது நடவடிக்கை எடுக்கக் கோரி மனு அளித்தனா்.