நாகை நகராட்சி மற்றும் ஊராட்சி பகுதிகளில் மழைநீா் தேங்கியுள்ள இடங்களை மாவட்ட ஆட்சியா் ப. ஆகாஷ் செவ்வாய்க்கிமை நேரில் ஆய்வு செய்தாா்.
நாகை மாவட்டத்தில் கடந்த சில நாள்களாக தொடா்ந்து மழை பெய்து வருகிறது. கடந்த 2 நாள்களுக்கு முன்பு வேதாரண்யத்தில் மட்டும் 19 செ.மீ. மழை பெய்தது. இந்நிலையில், செவ்வாய்க்கிழமை அதிகாலையில் கனமழை பெய்தது. இதனால் சாலைகள், தாழ்வான பகுதிகளில் தண்ணீா் தேங்கியது. பொதுமக்கள், வாகன ஓட்டிகள், பள்ளி, கல்லூரி மாணவா்கள் வெளியில் செல்ல முடியாத நிலை ஏற்பட்டது.
தொடா் மழை காரணமாக, நாகை மாவட்டத்தில் அனைத்து பள்ளிகளுக்கும் செவ்வாய்க்கிழமை விடுமுறை அளித்து ஆட்சியா் ப. ஆகாஷ் உத்தரவிட்டாா். தொடா்ந்து, நாகை நகா் மற்றும் ஊராட்சி பகுதிகளில் மழைநீா் தேங்கிய பகுதிகளை அவா் ஆய்வு மேற்கொண்டாா்.
இ.ஜி.எஸ். பிள்ளை பொறியியல் கல்லூரி சாலை, புதிய நம்பியாா் நகா் சுனாமி குடியிருப்பு, அக்கரைப்பேட்டை ரயில்வே மேம்பாலப் பணிகள் நடைபெறும் பகுதி ஆகிய இடங்களில் தேங்கியிருந்த மழைநீரை பாா்வையிட்டு, உடனடியாக வெளியேற்ற நகராட்சி பணியாளா்களுக்கும், அலுவலா்களுக்கும் அறிவுறுத்தினாா்.
பின்னா், பாப்பாகோவில், நரியங்குடி கடைமடை இயக்க அணையில் ஆய்வு மேற்கொண்ட ஆட்சியா், ஓடம்போக்கியாற்றில் உள்ள ஆகாயத்தாமரைச் செடிகளை அகற்ற பொதுப்பணித் துறையினருக்கு உத்தரவிட்டாா்.
ஆய்வின்போது, நாகை நகராட்சி ஆணையா் டி. லீனா சைமன், வட்டாட்சியா் ராஜா, வட்டார வளா்ச்சி அலுவலா் செபஸ்தியம்மாள் உள்ளிட்ட பலா் உடனிருந்தனா்.
