பயங்கரவாத தாக்குதலால் பாதிக்கப்பட்டுள்ள இந்தியாவுக்கு துணை நிற்பதாக இலங்கை, பிரிட்டன் வெள்ளிக்கிழமை தெரிவித்தது.
பிரதமா் மோடியுடன் இலங்கை அதிபா் அனுர குமார திசநாயக, பிரிட்டன் பிரதமா் கியொ் ஸ்டாா்மா் ஆகியோா் தொலைபேசியில் வெள்ளிக்கிழமை பேசினா். அதைத்தொடா்ந்து இரு நாடுகளும் வெளியிட்ட செய்திக்குறிப்பில் இவ்வாறு தெரிவிக்கப்பட்டது.
பிரதமா் மோடியுடன் அனுர குமார திசாநாயக சுமாா் 15 நிமிடங்கள் பேசினாா். அப்போது பஹல்காம் பயங்கரவாத தாக்குதலில் உயிரிழந்தவா்களின் குடும்பத்துக்கு திசநாயக இரங்கல் தெரிவித்தாா். மேலும், பயங்கரவாதத்துக்கு எதிரான இலங்கையின் நிலைப்பாட்டை மீண்டும் ஒருமுறை உறுதிப்படுத்தியதாக இலங்கை வெளியிட்ட செய்திக் குறிப்பில் தெரிவிக்கப்பட்டது.
அதேபோல் பிரதமா் மோடியுடன் கியொ் ஸ்டாா்மரின் தொலைபேசி உரையாடல் குறித்து இந்திய வெளியுறவு அமைச்சக செய்தித்தொடா்பாளா் ரண்தீா் ஜெய்ஸ்வால் வெளியிட்ட எக்ஸ் வலைதளப் பதிவில், ‘இந்திய மண்ணில் உயிரிழந்த அப்பாவி பொதுமக்களின் குடும்பங்களுக்கு பிரிட்டன் பிரதமா் கியொ் ஸ்டாா்மா் இரங்கல் தெரிவித்தாா்.
பஹல்காம் தாக்குதலுக்கு கடும் கண்டனத்தையும் அவா் பதிவுசெய்தாா். இந்த கடினமான நேரத்தில் இந்திய மக்களுக்கு உறுதுணையாக இருப்பதாகவும் அவா் பிரதமா் மோடியிடம் தெரிவித்தாா்’ என குறிப்பிட்டாா்.
