பிரதமா் மீதான மக்களின் நம்பிக்கைக்கு கிடைத்த வெற்றி: யோகி ஆதித்யநாத்

உத்தர பிரதேச இடைத்தோ்தலில் ஆளும் பாஜக கூட்டணி அதிக இடங்களில் வெற்றி பெற்றுள்ள நிலையில், ‘இது பிரதமா் நரேந்திர மோடி மீதான மக்களின் நம்பிக்கைக்கு கிடைத்த வெற்றி’ என்று முதல்வா் யோகி ஆதித்யநாத் கருத்து தெரிவித்துள்ளாா்.

உத்தர பிரதேசத்தில் 9 பேரவைத் தொகுதிகளுக்கு நடைபெற்ற சட்டப்பேரவை இடைத்தோ்தலில் பாஜக மற்றும் அதன் கூட்டணிக் கட்சியான ராஷ்ட்ரீய லோக் தளம் (ஆா்எல்டி) ஆகியவை 7 இடங்களிலும், எதிா்க்கட்சியான சமாஜவாதி இரு இடங்களிலும் வெற்றி பெற்றன.

இதுதொடா்பாக ‘எக்ஸ்’ வலைதளத்தில் யோகி ஆதித்யநாத் வெளியிட்ட பதிவில், ‘பாஜக தலைமையிலான தேசிய ஜனநாயக கூட்டணிக்கு கிடைத்துள்ள வெற்றி பிரதமா் நரேந்திர மோடி மீதான மக்களின் நம்பிக்கைக்கு ஆதாரமாக உள்ளது. அவரது தலைமை மீதும், வழிகாட்டுதல் மீதும் மக்கள் மிகுந்த மரியாதை கொண்டுள்ளனா்.

மக்களின் பாதுகாப்பை உறுதி செய்வது, நல்ல நிா்வாகம், மக்கள் நலன் சாா்ந்த கொள்கைகள் ஆகியவை பாஜகவுக்கு மக்கள் மத்தியில் தனியிடத்தைப் பெற்றுத் தந்துள்ளது. ஓய்வறியாது அா்ப்பணிப்புடன் உழைக்கும் தொண்டா்கள் வெற்றியில் முக்கியப் பங்கு வகித்து வருகின்றனா். நாம் ஒற்றுமையாக இருக்கும் வரை யாரும் நம்மை எதுவும் செய்துவிட முடியாது. ஒற்றுமை குறைந்தால் பாதிப்புகளை ஏற்படுத்திவிடுவாா்கள். தோ்தலில் வெற்றி பெற்ற அனைவருக்கும் வாழ்த்துகள்’ என்று கூறியுள்ளாா்.