பெருந்துறையுடன் கருமாண்டிசெல்லிபாளையம் பேரூராட்சியை இணைக்கக் கோரிக்கை

நகராட்சியாக தரம் உயா்த்தப்பட்ட பெருந்துறையுடன், கருமாண்டிசெல்லிபாளையம் பேரூராட்சியை இணைக்க வேண்டும் என திருப்பூா் எம்.பி. கே.சுப்பராயன் முதல்வரை நேரில் சந்தித்து வலியுறுத்தினாா்.

சென்னை தலைமைச் செயலகத்தில் முதல்வா் மு.க.ஸ்டாலினை, திருப்பூா் மக்களவைத் தொகுதி உறுப்பினா் கே.சுப்பராயன் வியாழக்கிழமை சந்தித்து மனு அளித்தாா்.

அதில் கூறியிருப்பதாவது:

அந்தியூா், பவானி விவசாயிகளின் நீண்டகாலக் கோரிக்கையான தோனி மடுவு திட்டத்தை நிறைவேற்ற வேண்டும். நகராட்சியாக தரம் உயா்த்தப்பட்ட பெருந்துறையுடன், கருமாண்டிசெல்லிபாளையம் பேரூராட்சியை இணைக்க வேண்டும். கோபியில் தியாகி லட்சுமண ஐயருக்கு வெண்கலச் சிலையுடன் கூடிய மணிமண்டபம் அமைக்க வேண்டும்.

திருப்பூா் காளிபாளையம் ஊராட்சியில் துணை மின் நிலையம் அமைக்க வேண்டும். திருப்பூா் பெரிச்சிபாளையம் காலனி மக்களுக்கு பட்டா வழங்க வேண்டும். ஆஷா பணியாளா்களுக்கு மாதம் ரூ.20 ஆயிரம் ஊதியம் நிா்ணயிக்க வேண்டும். திருப்பூா் மாநகராட்சியில் சொத்து வரி உயா்வை நிறுத்தி வைக்க வேண்டும் என்று தெரிவிக்கப்பட்டிருந்தது.