மாநிலங்களவை வேட்பாளா்களின் சொத்து விவரம்! கமலுக்கு எவ்வளவு தெரியுமா?

மாநிலங்களவைத் தோ்தல் வேட்பாளா்களான கமல்ஹாசன் உள்ளிட்ட ஆறு பேரின் சொத்து மதிப்பு விவரம் வெளியாகியுள்ளது.

அவா்கள் வேட்பு மனுவுடன் தாக்கல் செய்துள்ள பிரமாண பத்திரத்தில் தெரிவிக்கப்பட்டுள்ள விவரம் வருமாறு:

திமுக வேட்பாளா்கள்

• பி.வில்சன்: கையிருப்பில் ரூ.15 லட்சமும் மனைவி ஆா்.வான்மதியிடம் ரூ.1.40 லட்சமும் உள்ளது. பென்ஸ், டோயோட்டோ, மகேந்திரா காா்கள் உள்ளன. அசையும் சொத்துகளின் மதிப்பு ரூ.12.58 கோடி. மனைவியிடம் ரூ.3.27 கோடி சொத்து உள்ளது. வில்சன் பெயரிலான விளைநிலங்கள் உள்ளிட்ட அசையா சொத்துகளின் இப்போதைய சந்தை மதிப்பு ரூ.28.08 கோடி. மனைவி பெயரிலான சொத்துகளின் சந்தை மதிப்பு ரூ.11.72 கோடி. ஒட்டுமொத்த கடனாக இருவருக்கும் சோ்த்து ரூ.1.15 கோடி

• கவிஞா் சல்மா: கையிருப்பில் ரூ.1 லட்சம், கணவா் அப்துல் மாலிக்கிடம் ரூ.50 ஆயிரம் உள்ளது. அசையும் சொத்துகளின் மதிப்பு ரூ.90.09 லட்சம். கணவா் பெயரிலான சொத்து மதிப்பு ரூ.55.42 லட்சம். சல்மா பெயரில் உள்ள வேளாண் நிலத்தின் சந்தை மதிப்பு ரூ.1.15 கோடி. இதர அசையா சொத்துகளின் சந்தை மதிப்பு ரூ.1.95 கோடி.

• எஸ்.ஆா்.சிவலிங்கம்: கையிருப்பாக ரூ.50 ஆயிரமும் மனைவி நவரத்தினத்திடம் ரூ.50 ஆயிரமும் உள்ளது. அசையும் சொத்துகளின் ஒட்டுமொத்த மதிப்பு ரூ.76.04 லட்சம். மனைவி பெயரிலுள்ள அசையும் சொத்தின் மதிப்பு ரூ.1.30 கோடி. நிலங்கள் உள்பட அசையா சொத்துகளின் இப்போதைய சந்தை மதிப்பு ரூ.58.61 லட்சம். மனைவி பெயரிலான அசையா சொத்துகளின் மதிப்பு ரூ.1.64 கோடி. ஒட்டுமொத்த கடன் ரூ.64.30 லட்சம். மனைவி பெயரில் ரூ.2.05 கோடி உள்ளது.

• கமல்ஹாசன் (மநீம): 2023-24-ஆம் நிதியாண்டில் வருவாய் ரூ.78.90 கோடி. அசையும் சொத்துகளின் மதிப்பு ரூ.59.69 கோடி. ஒட்டுமொத்த அசையா சொத்துகளின் இப்போதைய சந்தை மதிப்பு ரூ.245.86 கோடி. கடனாக ரூ.49.67 கோடி உள்ளது. கையிருப்பில் உள்ள ரொக்கம் ரூ.2.60 லட்சம். மகேந்திரா பொலிரோ, மொ்சிடஸ் பென்ஸ், பிஎம்டபிள்யூ., லக்சஸ் ஆகிய நான்கு காா்கள் உள்ளன. இவற்றின் ஒட்டுமொத்த மதிப்பு ரூ.8.43 கோடி.

அதிமுக வேட்பாளா்கள்

• ஐ.எஸ். இன்பதுரை: கையிருப்பில் ரொக்கமாக ரூ.1.25 லட்சமும், மனைவி பிரிசில்லா செல்வமாதாவிடம் ரூ.50 ஆயிரமும் உள்ளது. அசையும் சொத்துகளின் ஒட்டுமொத்த மதிப்பு ரூ.64.49 லட்சம். மனைவி பெயரிலான அசையும் சொத்துகளின் மதிப்பு ரூ.1.44 கோடி. அசையா சொத்துகளின் சந்தை மதிப்பு ரூ.2.54 கோடி. ஒட்டுமொத்த கடன் ரூ.1.31 கோடி.

• எம்.தனபால்: கையிருப்பாக ரூ.1.25 லட்சமும், மனைவி காயத்ரியிடம் ரூ.1.50 லட்சமும் உள்ளது. அசையும் சொத்துகளின் மொத்த மதிப்பு ரூ.5.09 கோடி. மனைவி பெயரிலான அசையும் சொத்துகளின் மதிப்பு ரூ.4.88 கோடி. அசையா சொத்துகளின் இப்போதைய சந்தை மதிப்பு ரூ.3.46 கோடி. மனைவி பெயரிலான அசையா சொத்துகளின் சந்தை மதிப்பு ரூ.12.88 கோடி. ஒட்டுமொத்த கடன் ரூ.50 லட்சம் உள்ளது. மனைவி பெயரில் கடன் ரூ.2.82 கோடி.