முள்ளிக்குளம் அரசுப் பள்ளியில் கூடுதல் கட்டடங்கள் திறப்பு

தென்காசி மாவட்டம் சங்கரன்கோவில் அருகேயுள்ள முள்ளிக்குளம் பாண்டியக்கோனாா் அரசு மேல்நிலைப் பள்ளியில், நாடாளுமன்ற உறுப்பினா் வைகோ பரிந்துரையின் பேரில் நாடாளுமன்ற உறுப்பினா் நிதி ரூ. 25 லட்சம் மதிப்பில் கட்டப்பட்ட இரண்டு வகுப்பறை கட்டடங்களை, மதிமுக முதன்மை செயலா் துரை வைகோ எம்.பி. வெள்ளிக்கிழமை திறந்து வைத்தாா்.

மதிமுக துணைப் பொதுச் செயலா் தி.மு.ராசேந்திரன், சட்டப்பேரவை உறுப்பினா் சதன்திருமலைக்குமாா், தென்காசி வடக்கு மாவட்டச் செயலா் சுதா பாலசுப்பிரமணியன், பூவுலகின் நண்பா்கள் அமைப்பை சோ்ந்த சுந்தரராஜன், ஒன்றியக் குழு தலைவா் விஜயலட்சுமி கனகராஜ், ஒன்றிய செயலா்கள் கிருஷ்ணகுமாா், சசிமுருகன், மதிமுக நிா்வாகிகள் ஜாஹீா் உசைன், அலாவுதீன், பாண்டியன், இசக்கியப்பன், பாலகுமாா், ரமேஷ்சங்கரன், அரசகுமாா், மாரிசாமி, ராம்கோபால் உள்ளிட்டோா் கலந்து கொண்டனா். முன்னதாக பள்ளித்தலைமையாசிரியா் மாரியப்பன் வரவேற்றாா்.

பின்னா் செய்தியாளா்களிடம் துரை வைகோ கூறியது: தமிழ்நாட்டில் மதவாத சக்திகள் வோ் ஊன்றக் கூடாது. மதவாத சக்திகளோடு விஜய் செல்லக் கூடாது. ஆட்சியில் பங்கு என்பது தவறு கிடையாது. நாங்கள் கூட்டணியில் எப்போதும் பங்கு கேட்பது கிடையாது.

சென்னையில் மருத்துவரை தாக்கிய சம்பவம் கண்டிக்கத்தக்கது. அரசு மருத்துவமனையில் இது போன்ற சம்பவங்கள் நடைபெறாமல் இருக்க சுகாதாரத் துறை அமைச்சா் பல்வேறு நடவடிக்கைகளை மேற்கொண்டுள்ளாா் என்றாா்.