ரேஷன் கடைகளை திறப்பதற்கான முன்னேற்பாடுகள்: அமைச்சா் ஆய்வு

காரைக்கால்: காரைக்காலில் பல ஆண்டுகளுக்குப் பின் ரேஷன் கடைகள் திறக்கப்படவுள்ள நிலையில், கடைகளை தயாா்படுத்தும் பணியை அமைச்சா் திங்கள்கிழமை ஆய்வு செய்தாா்.

புதுவை மாநிலத்தில் 2016-ஆம் ஆண்டுக்கு முன்பு ரேஷன் கடைகள் மூடப்பட்டன. ஊழியா்களுக்கு ஊதியம் தரப்படவில்லை. பல மாத நிலுவையை வழங்கக் கோரியும், கடைகளை திறக்கக்கோரியும் ஊழியா்கள் பலகட்ட போராட்டங்களை நடத்தியும் தீா்வு இல்லை.

இந்தநிலையில் புதுவையில் ரேஷன் கடைகள் திறந்து, இலவச அரிசி, சா்க்கரை உள்ளிட்ட அத்தியாவசியப் பொருள்கள் வழங்கப்படும் என பட்ஜெட்டில் அறிவிப்பு வெளியானது.

தீபாவளியையொட்டி அனைத்து குடும்ப அட்டைதாரா்களுக்கும் 10 கிலோ இலவச அரிசி, 2 கிலோ சா்க்கரை வழங்கப்படும் என முதல்வா் என். ரஙக்கசாமி அறிவித்தாா். புதுச்சேரியில் ரேஷன் கடைகள் மீண்டும் 21-ஆம் தேதி திறக்கப்பட்டது.

காரைக்காலுக்கான அரிசி, சா்க்கரை இதுவரை வந்து சேரவில்லை என கூறப்படுகிறது. எனினும் மாவட்டத்தில் உள்ள 91 ரேஷன் கடைகளை தயாா்படுத்தும் பணிகளை குடிமைப் பொருள் வழங்கல் துறையினா் கடந்த சில நாள்களாக மேற்கொண்டு வருகின்றனா். இப்பணியை புதுவை குடிமைப் பொருள் வழங்கல் மற்றும் நுகா்வோா் விவகாரங்கள் துறை அமைச்சா் பி.ஆா்.என். திருமுருகன் ஆய்வு செய்தாா். காரைக்காலில் 26-ஆம் தேதிக்குள் கடைகளை திறப்பதற்கான வாய்ப்புள்ளதாக கூறப்படுகிறது.

இலவச அரிசி, சா்க்கரை மட்டும் தந்துவிட்டு கடைகளை முடக்கிவிடாமல், தமிழகத்தைப்போல ரேஷன் கடைகளில் மக்களுக்குத் தேவையான அத்தியாவசியப் பொருள்கள் அனைத்தும் வழங்கவேண்டும். ரேஷன் அட்டை காலவாதியாகிவிட்ட நிலையில், புதிதாக ஸ்மாா்ட் காா்டு வழங்கி, மக்கள் பொருள்கள் வாங்கியதை அவா்களது கைப்பேசியில் குறுஞ்செய்தியாக அனுப்பிவைக்கும் வகையில் நவீன நடைமுறைக்கு அரசு ஏற்பாடு செய்யவேண்டும் என பொதுமக்கள் வலியுறுத்துகின்றனா்.