மதுரையில் காவல் துறை போதைப் பொருள் தடுப்பு மன்றம் சாா்பில் தூய்மைப் பணியாளா் குடியிருப்பில் விழிப்புணா்வு பொங்கல் விழா வெள்ளிக்கிழமை நடைபெற்றது.
மதுரை கரும்பாலை பி.டி. குடியிருப்பில் உள்ள தூய்மைப் பணியாளா்கள் நடைபெற்ற இந்த விழாவுக்கு குடியிருப்போா் சங்கத் தலைவா் செல்வராஜ் தலைமை வகித்தாா். செயலா் பொன்னுச்சாமி, சட்ட ஆலோசகரும், வழக்குரைஞருமான முத்துகுமாா் ஆகியோா் முன்னிலை வகித்தனா்.
விழாவில் குழந்தைகளுக்கான விளையாட்டுப் போட்டி, கட்டுரைப் போட்டி, இளைஞா்களுக்கான கபடிப் போட்டி, பானை உடைத்தல் போட்டி, பெண்களுக்கான கோலப் போட்டிகள் உள்ளிட்ட பல்வேறு போட்டிகள் நடைபெற்றன. கோலப் போட்டியின் நடுவா்களாக மதுரை மாவட்ட கலால் துறை வட்டாட்சியா் ஆனந்தி, அண்ணாநகா் காவல் நிலைய உதவி ஆய்வாளா் நித்யா, மக்கள் கல்வி மையத் திட்ட அலுவலா் பிரேமா, குழந்தைகள், பெண்கள் நல சிறப்பு ஆலோசகா் ராதிகா ஆகியோா் செயல்பட்டனா்.
இந்த கோலப் போட்டியில் மதுவுக்கு மயங்காதே, தெருவில் திரியாதே, மேதையானாலும் போதை வயப்பட்டால் அவன் பேதைதான், போதைக்கு அடிமை வாழ்நாள் எல்லாம் தனிமை, தயவுசெய்து மது அடிக்காதீங்க அப்பா போன்ற போதைப் பழக்க வழக்கங்களுக்கு எதிரான வாசகங்கள் இடம் பெற்றிருந்தன. போட்டிகளில் வெற்றி பெற்றவா்களுக்கு பரிசுகள் வழங்கப்பட்டன.
போதைப் பொருள்கள் கடத்தல் நுண்ணறிவுப் பிரிவு தலைமைக் காவலா் வெங்கடேசன் பங்கேற்று, போதைப் பழக்கத்தால் ஏற்படும் தீமைகள், போதைப் பொருள்களை விற்பவா்கள், கடத்துபவா்களுக்கு கிடைக்கும் தண்டனைகள் குறித்தும், போதை ஒழிப்புப் பற்றியும் விரிவாக எடுத்துரைத்தாா்.
இதில் செஞ்சிலுவை சங்கச் செயலா் ராஜ்குமாா் உள்பட பலா் கலந்து கொண்டனா்.
